Meitei leh Hmar ten inremna siam

Meitei leh Hmar community te chuan buaina thlenna Manipur a Jiribam district-ah remna leh muanna a awm theih nan hmalak dun an rem ti.
Assam-a Cachar district a CRPF huaihawta meeting neihnaah inremna siam theiin he meeting hi Jiribam district administration, Assam Rifles leh CRPF personnel tena an kaihhruai a ni a. Thadou, Paite leh Mizo community te Jiribam district a awm te pawh an tel ve bawk.
“Meeting chuan, remna leh muanna a awm a, inkahna leh inhalna a awm loh nan hnam pahnih ten hma an la ang a. Hnam pahnih te chuan Jiribam district-a security forces te an thawhpui bawk ang a. Hnam pahnihte chuan inberawn chunga chetlak zel an remti a ni,” tiin joint statement tihchhuah chuan a tarlang bawk a. August 15-ah meeting neih leh tura tih a ni bawk.
Nikum May thlaa Imphal Valley-a inbun Meitei leh a chhehvel tlangrama Kuki-Zo chengte kara buaina chhuak avangin mi 200 chuangin nunna an chan phah tawh a ni.
Hnam hrang hrang awmna Jiribam chu Imphal valley leh tlangrama buaina chuan a tibuai lo hle a, mahse, kumin June thlaa loneitu ruang chhar a nih hnuah buaina a chhuak ta a ni.
Hnam pahnihte chuan chenna in inhalsakin hei vang hian mi tam takin in leh lo hlohin relief camp-ah an awm phah a. July thla laihawl khan hel pawl ten an lambun avangin CRPF jawan in nunna a chan phah tawh bawk.