Messi contract ziah hmasakberna lehkhapuan phek khat lilam dawn

Barcelona football sikul hmingthang La Masia atanga inzirchhuak Lionel Messi chuan kum 13 mi a nih lai khan Catalan team-ah a vawikhatna’n con-tract a ziak a, khami tuma an lehkhapuan (paper napkin) hman kha an lilam dawn a, £300,000 atangin an tan ang a, engzat tak hawlh pha ang maw?
He lehkhapuan tlahlanga contract an ziah lai hi December 2000 kha niin, khatih laia Barca director Carles Rexach remtih-nain Messi lakluh a ni a; khatih laia club transfer advisor Josep Minguella chuan Nou Camp club aiawhin hming a ziak a, Catalan club-a lut tura Argen-tine recommend-tu agent Hora-cio Gaggioli hming a tel.
He contract ziak tura in-hmuhkhawm huaihawttu ber Rexach chuan chawchhun eiah Messi pa Jorge chu sawmin, he mi hma hian Argentine rawlthar tan tir chuan Barcelona-ah trial hmasa a zo a, Messi chhung-kuain club lam atanga an fapa chinchang hriattirna an dawn nghal mai loh hnuah chaw-chhun ei tura sawmna hi pa berin a dawng ta a ni.
Chu inhmuhkhawmah chuan pen tui pawl leh lehkhapuan thlahlang pakhat hi dawhkanah an lo chhawp ran a, tah chuan he ti deuh hian ziah a ni:
“Barcelona a ni a, kum 2000 December ni 14 hian pute Minguella, Horacio leh FC Barcelona sporting director Carles Rexach-te hmaah he-tiang hian pawm a ni, a mawh-phurhna leh ngaihdan ni lo awm theite nen huap vekin player Lionel Messi chu inremna ziahpui a ni,” ti ang deuhin!
He inremna lehkhapuan hi thlathar, March thla hian British auction house Bonhams kal-tlangin an lilam ang.
Contract an ziah atanga a thlalehah Messi chuan Barca a zawm fel a, khatih lai khan Argentine rawlthar thang mawh ve tak chu an club chanchina goal khung hnem ber a la ni ang tih ring awm tak ang maw?
La Masia atangin ei a tling chho a, rawlthar kum 16 mi lek a la nih laiin Barcelona senior team tan a khel tan a, kum 2021-a Paris St-Germain pana a inputchhuah thleng khan Catalan club tan game 778-ah goal 672 tehreng a tilut tling hman a; La Liga title 10 bakah Champions League title pali ngawt a lakpui hman bawk.
Kum 36 mi ni ve ta Messi contract ziahna lehkhapuan hlu bik a dawn hnuah Bonhams-a head of fine books and manus-cripts nihna chelhtu Ian Ehling chuan item a dawn tawha la phurawm ber a ih thu sawi chungin, “Ni e, paper napkin mai phei chu a ni a, mahse, Lionel Messi career hriltu napkin hmingthang a ni tlat.
“He lehkhapuan tla hlang ve mai hian Messi hringnun chu a thlakthleng hlawk a, Barcelona hmalam hun hriltu niin, khawvel puma fans vaibelchhe tam takte hmaa football hun ropui ber ber hringchhuaktu a ni.”