Messi hmachhawn tur Pickford

Messi hmachhawn tur Pickford
Football piahlam, ram leh ram politik huang thlenga inhmelma hlun leh thliarkar inchuha indo hial tawh England leh Argentina-te intawn hnuhnunber 2002 World Cup group stage-a kum riat mi lek la ni England record-breaking goalkeeper Jordan Pickford chuan zanin hian a vawi khatna atan Lionel Messi a hmachhawn ve dawn ta nge nge a, chu mi chungchang chu thlirho teh ang.
Kum 32-a upa ni tawh Everton player hi veteran goalkeeper hnaih chho ve tan dawn tawh mah se eight-time Ballon d’Or winner Messi hi a lo la hmachhawn ngai hauh lo a, zanina reigning champion Argentina leh Three Lions-in final luh an inchuhna tur inkhel hi mi tam takin GOAT ang hiala an pawm Argentine superstar laka a dinhmun a tihchianna hun remchang hmasaber a ni dawn!
Chuti ang bawkin, Messi tan pawh zanin hi a career sei tawh taka England a hmachhawn vawi khatna tur ve tho a ni!
Quarter-final match pakhata Norway an hnehna inkhel kha Pickford-a tan World Cup match 18 a khelh tlinna chiah niin, a hma zawnga England tana World Cup game khel hnem ber ni reng thin Peter Shilton-a record a khum ta a ni.
Chuti ang mi chuan a la hmachhawn ngai loh Argentina leh Messi hmaa fiahna a paltlang tur chungchangah defending champion chu one-man team anga en mai chi an nih loh thu leh mite’n an captain-a innghat ngawr ngawra an puh thinna chu belhchian dawl lo a nih thu sawiin, zanina an tum tur team chu huho chakna nei, Messi lo pawh goal khung thei kawl fur an nih thu a sawichhuak.
England hi Thomas Tuchel-a hnuaiah an fuh chho viau mai a; an inpumkhatna a tha a, hun khirhkhan leh harsa an tawh tum pawhin leirem an rap leh mai thin a, pressure sang tak hnuaiah pawh kawng an zawh sual zen zen duh lo a, chak lo tura ngaih an nih thuak hnuah pawh nungchang hloh loin an damkhawchhuak leh mai thin a, kuminah pawh World Cup semi-final hial an lut a, Argentina lakah pawh rinkai lo zawk han tih chiam ngam an ni lo ang!
Kumin World Cup-a sawi hlawh tak pakhat chu Fifa leh an hnuaia match official-te’n Argentina an duhsak bik nia puhna chungchang hi niin, Pickford thung chuan he boruak hi buaipui chiam an tum loh thu leh refereeing chungchanga complaint awm thin lam an thupui ber a nih loh thu a sawi.
England goalkeeper hian a record-breaking career-ah World Cup penalty shootout leh semi-final boruak tem tawhin, football-a hming hraw ber ber pawh a lo hmachhawn tawh a, mahse, tun hmaa a la tem ngai loh chona lian puiin a hmuak mek a, chu chu zanina a hmachhawn tur Lionel Messi leh reigning champion Argentina an ni.
England number one chuan Messi a hriat tan tirh lam boruak sawichhuakin, “Ka la hre reng mai, sikul chhuata thusawp chungin TV kan en thap a, ka theihnghilh thei lo.
“A career-ah goal tam tak thunin, assist thahnem tak a nei bawk a, naupan lai atanga a inkhel ka lo thlir tawh leh hun rei tak ka lo nghah tawh ngei mai chu a tawpa tawpah ka ep ve thei dawn ta,” tiin a vawi rukna atana World Cup-a inlan leh mek kum 39 mi Argentina captain chungchang a sawi.
English goalkeeper hian Argentina chu mi sawi anga one-man team an nih loh thu tarlang telin, “Messi thatzia chu mi zawng zawng hriat a ni ngei mai a, mahse, Argentina thatzia pawh hmuhhmaih theih a ni lo. Midangte thatna leh panna lai thlir kawp chunga advantage kan zawn a ngai,” tiin.