Messi lo zin leh a chhehvel boruak

Messi lo zin leh a chhehvel boruak
Inrinni khan Lionel Messi leh a thian thenkhat chu GOAT India Tour 2025 bul tan turin Kolkata an thlawklut a; football atchilh khawpuia an stadium hmingthang Salt Lake stadium chhungah mipui hmuh tura minute 22 tha chauh a inlan avangin sum tam tak senga Messi lawm tura khelmual lut fans lungawi loin buaina namen lo chawkchhuakin, stadium chhung an suasam!
India rama Messi zuitu langsar pahnihte chu a Inter Miami team-mate ve ve Rodrigo De Paul leh Luis Suarez-te an ni.
Kolkata-a tour first leg an zawh hnu hian Hyderabad panpui a ni a, tah hi chuan management leh security a ziaawm ta a, buaina lian chhuak loin an tlingtla thei a; mi 100 tana thla lakpuina hun hawn tur thu puan lawk a ni a, Messi thla lakpui man hi mi pakhat tan nuai 10 zu han chhiar a!
Nimin chawhnu lam khan khawpui pali a tlawh tur zinga a pathumna Mumbai lut lehin, tah phei hi chuan ‘World Cup level’ security nena lo hmuah a ni!
Ruahman lawk dan chuan GOAT India Tour 2025 hmawrbawkna hi vawiin atan dah niin, Argentine football icon Lionel Messi hian Prime Minister Narendra Modi chenna in a tlawh ang a, tah chuan minute 20 an inkawm ang.
He mi zawh hian Parliament house panpui niin, tah hian Chief Justice of India Surya Kant leh Army chief general Upendra Dwivedi bakah Argentina Ambassador to India Mariano Agustin Caucino an hmuhpui leh dawn a ni.
Delhi leg leh GOAT India Tour final day ni bawkah hian Ferozshah Kotla Stadium-ah Indian cricket team member-te chu Messi hmuhna hun siamsak an ni dawn a, Indian football team-te nena an inkawmho dawn awm thawm hriat tur a awm lo thung!
He boruakah hian India captain hlui Sunil Chhetri chuan tute emaw sumdawnna leh Argentine hausak belhna tura Messi an chahluh chu chhim ve a tum loh thu a lo sawichhuak tawh a ni!
Ti chuan, vawiina Messi hmu tur parliament member-te zingah term thum ngawt All India Football Federation president hna lo chelh tawh Nationalist Congress Party (NCP) leader Praful Patel a tel.
Messi hian nawmsakna tinrenga thuam thlawhna (ultra-luxurious Gulfstream V private jet) hmangin India hi a lo thlawklut a; a private jet kha kum 2018-a US dollar maktaduai 15 zeta a lei niin, chu chu India pawisain cheng vaibelchhe 136 chuang a ni hem mai!
Tukin chawhma dar 10.45-ah Delhi leilung a rap dawn a; a thlena hotel-a minute 50 awh ‘Meet and Greet’ session a hman zawhah PM chenna in a pan zui dawn a ni.
Ferozshah Kotla Stadium lama programme thenkhat a hman leh hnu vawiin tlai dar 3.30 hian GOAT concert chhimin stadium a lut leh ang a; dar 3.55 atanga dar 4.15 chhungin naupag thlan bik 22-te nen football clinic hun hmang lehin, a haw dawn hnaihah Indian Indian cricketer pahnihin thilpek an hlan ang a, Argentine footballer hian a hming ziahna jersey a hlanlet ve ve bawk ang.
Kolkata boruak
Khawvela footballer lar berin Inrinnia Salt Lake Stadium a tlawh zet chu City of Joy meuh pawh thinrimin a sapatal a ni ber a; kalphung fel tawk lo leh venhimna lam fuh tawk lo avangin an nghah Messi ber pawh chu khelmual chhungah darkar chanve pawh an awmpui ngam lo!
Minute 22 lek khelmuala Messi inlan kha cheng tam tak senga ticket leitute’n an ngaithiam leh si lo a, an sum sen nen inphu loin an hria a, fans thinrimin bottle an thlawh ur ur a; an hmuh phak apiang khelmual chhung bungrua an sawisa a; security protocol-in awmzia a neih loh hnuah police za tam an tlanlut a, Salt Lake Stadium a sawi bui mai!
Tunnel atanga Messi lo lan rualin mipui chu thunun hleih theih lohin an buai nghal a; an hun hman tur pawh tihtawi a ngai ta hial a; special event nei tura Kolkata thlawklut Bollywood superstar Shah Rukh Khan leh India cricket captain hlui Sourav Ganguly bakah West Bengal chief minister Mamata Banerjee-te paw’n programme an chhim thei ta lo!
Khati a nih takah khan India rama Messi leh a thiante chahluttu GOAT Tour organiser leh promoter Shatadru Datta chu police lamin an kawl phah hial a ni!
Khelmual chhunga Argentine star chetla lai a hmuna thlir tur ringawt khan fans pakhatin Rs. 4,500 atanga Rs. 10,000 man ticket an lei a; thenkhat chuan an thla khat hlawhte ticket leina’na an hman avangin Messi inlan chhung rei ta lo lutuk khan an thin a tirim ta a ni.
West Bengal Director General of Police (DGP) Rajeev Kumar chuan a hnu deuhah media hmachhawnin, boruak an thunun tawh thu leh fans thinrimna an hriatthiampui thu a sawi a; khelmuala Messi ball tawk vel leh kha aia rei zawk a inlan an beisei laia programme tihtawi a ni ta maiin buaina a thlen thu a sawi a, organiser an man thu a tarlang tel.
Inspector General (Law and Order) Javed Shamim pawhin dan ang taka investigation kalpui nghal a nih thu a sawi ve bawk.
Kolkata, Hyderabad, Mumbai leh Delhi tlawh tura ni thum cham tura India lo tlawhtu Messi bultanna duhawm lo viau mah se a hnu lam chu a ziaawm ta.
Kolkata khawpuiah hian ni 40 lek chhunga an peih fel tak khawvela Messi lim (statue) lian ber chu hawn a ni a, Argentine superstar ngei hi a hawngtu niin, feet 70 zeta sang he lim hi Sree Bhumi Sporting Club, Lake Town, Kolkata-a phun niin, eight-time Ballon d’Or winner Messi a ang vak lo!
Messi hian India a tlawh hnuhnunber kum 2011 khan friendly match khelin Salt Lake Stadium-ah hian Venezuela a lo hmachhawn tawh a, kha mi tum khan sikhat faiin Argentina chuan Venezuela an hneh.
Kolkata khuaah hian an tum angin mipui nawlpui hmaah hun hmang thei ta lo mah se Shah Rukh Khan leh a fapa AbRam-te chuan hnai takah an kawm thei ta tho a; mipui sang tam takin lunghnur taka anmahni in lam an pan hna hna laiin Khan-ate pafa chuan an hmu hnai hle!
2022 FIFA World Cup winner hian Inrinni zing dar 2.30 velah Kolkata a thlawklut a, lunghnur takin a chhuahsan a tih theih awm e!
Hyderabad leg
Inrinni tlai lamah GOAT India Tour 2025 chu Hyderabad khawpuiah a intan a; zan dar 7.50 khan City of Nizams hun hi exhibition match hmangin an khuhhawng a; he mi hma lawk hian Telangana Chief Minister A Revanth Reddy leh Lok Sabha Leader of Opposition Rahul Gandhi-te chuan stadium an lut ve bawk.
He khawpuia Messi hmuh tumte kalkawng pawh hi thenkhat tan a khirh hle a, stadium luhna ticket hi black market-a zuar pawl an lo awm leh hman tawh a, mipui 50,000 vel pungkhawm zinga a tam ber kha Rs. 4,000 atanga Rs. 12,000 sengte an ni a; black market-a ticket pakhat Rs. 20,000 zeta lei an kat nuk bawk niin an sawi!
Mipuiin khati zat sum an sen awk awk lai khan politician leh VVIP rual, security lam mite chu Messi hnaih hnaihah an tang a, an hliah vek zawk a tih theih ang!
Hyderabad khua hi Inrinni tlai dar 5:40-ah thlengin, three-day four-city GOAT Tour 2025-a khawpui pahnihnaah hian venhimna a tha tawh a, an buai tawh lo a, Taj Falaknuma Palace-ah Telangana Chief Minister Revanth Reddy chuan felfai takin a lo dawngsawng.
Messi, Saurez leh Rodrigo de Paul-te hi khelmualah inlan zuiin, GOAT Cup penalty shootout-ah football thuam inbel Reddy hoin an inlan a, stadium a chhuahsan hmain Messi hian naupang thlan bikte chu football clinic a neihpui bawk.
Kolkata buaina boruak chhe tak hnua boruak muanawm an siam avangin Messi hian Hyderabad fans hnenah lawmthu a sawi nghe nghe.
Mumbai pawh a muanawm
Nimin, Pathianni khan Mumbai-ah hun hmang lehin, football icon Lionel Messi hian chawhnu herah Mumbai a lut a; tarlan tak angin, ‘GOAT India Tour 2025’ ni hnihnaah phei hi chuan venhimna a tha zual a, India media-te tarlan danin, Pathiannia security an kalpui dan kha ‘World Cup level security’ a ni tawh!
World Cup-winning Argentine captain hi Taj, Colaba pan dingpui niin, a chawlhhahdam hlek hnuah Cricket Club of India enkawl Brabourne Stadium-ah Padel GOAT Club event a chhim a, tlai lamah a ho hian celebrity football match an thlir.
Mumbai Police-te an inralring tha bawk a, a inlanna khelmual pahnih leh a chhehvelah Mumbai police force hian an mi leh sa 2,000 zet an duty tir!