Messi malsawmna dawng Lamine Yamal

Euro 2024 khelh mekah rawlthar hmuhnawm zet mai a awm a, a hming chu Lamine Yamal a ni. Euro-ah record duhawm tak tak siamtu Yamal hi footballer ropui ber ang hiala ngaih Lionel Messi malsawm dawng a ni.
Kum 16 chuang zet liam taah khan footballer ropui, Pathianin thiamna ril a pek bik Lionel Messi chuan Lamine Yamal hi a pawm a, a bual a, malsawmna a hlan. Euro 2024-ah Yamal a vul hnuin Messi-a’n Yamal a bual leh a pawm lai thlalak hi a lar thar hluai. Chu thlalak chu khawvel in hmuhnawm a ti a, football ngainatute tan chanchin ngaihnawm a tling.
Argentina leh FC Barcelona player ropui Lionel Messi-a’n duat taka a pawm a, a bual bawk Lamine Yamal hi a puitling tawh a, Euro 2024-ah player hmuhnawm, Messi ang maia ngaihven hlawh a ni der tawh. Barcelona leh Spain rawlthar Yamal hian kum 16 leh ni 338 a upa ni chungin Euro 2024-ah Croatia a hmachhawn a, Euro khel thei naupang ber record a siam nghal. Kum 16 mi lek Yamal hi Spain coach Luis de la Fuente-a’n record siam tur ngawr ngawr a hruai leh a luhtir a ni lo. A thiam em vang leh Spain tan a pawimawh em vanga hruai a, bul tantir a ni. Team lian tak tak, Croatia, Italy, Germany leh France lakah player tha a nih zia a lantir a, he rawlthar Yamal hian football tihmuhnawm thar lehtu a ni.
Yamal hi football club ropui FC Barcelona tan rin phak bakin a khel tha a, La Liga, Super Copa leh Copa del Rey-ah te goal thun thei naupang ber a lo ni tawh. Barrcelona tan a khelh that em vangin Spain senior team tan khel turi koh a ni thuai a, ram tan record thar a siam leh nghal. 8 September 2023 khan Euro khel tur zawnnaah Georgia an hmachhawn tumin Spain tan a khel tan a, hetihlai hian kum 16 leh ni 57 a upa a ni. Georgia lakah hian minute 74-naah ram tan a goal hmasa ber a thun a, Spain tan goal thun thei naupang ber niin Gavi record a khum nghal pang.
Ram tan a khelh that chhoh em vangin De la Fuente chuan Euro 2024 khel turin a ko. Euro-ah Croatia an hmachhawn tumin bul a tan a, Euro khel thei naupang ber ni thin Kacper Kozłowski record khumin Euro record a siam. Euro 2024-ah hian khawvel hmuhnawm tih khawpin a khel a, assist vawi thum neiin rawlthar zingah inelna liana assist vawi thum nei thei hmasa ber a ni. Semi-final-ah France an hmachhawn tumin Yamal hian goal ropui a thun ta hial a, Euro ah goal thun thei naupang ber record a siam zui leh nghal a, football khawvel-ah a lal ram a zauh zau zel a ni ber mai.
Player tha tam takin beisei an phak lohna thin inelna lianah Yamal hi a chetha nghal em em mai a. Hlauhna, zamna, tihna leh inthlahrunna reng reng nei lo, engthawl leh nuamti takin a inlan. A hmaa ding tawh defender tawnhriat ngah tak takte a tibeidawng a, fing leh inringtawk takin a inlan. Kum 16 mi lek hetiang khawpa a thiam a, a fing a, a inringtawk hi zir thiam leh tawnhriat ni lovin, thil thawn pek hlu tak a dawn a ni. Lionel Messi thiamna hi thil thlawn pek tiin sawi a ni thin a. Yamal thiamna pawh hi thil pek tih lo rual a ni lo.
Footballer ropui fal pahnih; Lionel Messi leh Cristiano Ronaldo te uaithla lam niin an tha a thum tawh a, tun hma angin an hmuhnawm zo tawh lo. Football ngainatuten an inzawh thin chu Messi leh Ronaldo te hmunruak hi tunge luah zo ang tih a ni. An hmunruak luahtu atan Kylian Mbappe, Erling Haaland leh Jude Bellingham te hming sawi rik ni thin mah se mi thinlung an hmin thei meuh lo. Messi leh Ronaldo te anga football tihmuhnawm thar leh tur an zawn ruai ruai thin chu hmuh tur awmin, chhanna a awm ta a, chu chu a hming Lamine Yamal a ni. Kum 16 mi lek ni chunga club leh ram tan record hetiang zat hnutchhiah thei Yamal ngei hi football tihmuhnawm thar leh tu tur chu a ni.