Mizoramah ruihhlo a hluar a, heroin phei chu tun hnaiah a man tur a tam. Chutih laiin chanchin lawmawm pawh a awm ve tho a, meth a hluar tak tak rih lo tih te hi thu lawmawm a tling ang.
Kuminah May thla thleng khan Mizoram Excise & Narcotics (MEN) department-in meth hi kg 4.056 an man a, Mizoram Police te’n kg 25.380 an man. Hei hi kum hmasa lam nena khaikhinin a tam lo.
Kum liam ta 2022-a MEN department leh police te’n an man zawng zawng chu kg 332.301 a ni a, MEN department-in kg 115.007, police-in kg 217.294 an man. Chumi atanga teh chuan kumin thla nga chhunga an man hi a tlem rih.
2020-ah khan meth hi an pahniha an man zawng zawng chu kg 594.265 a ni a, 2021-ah kg 166.045 an man. 2020 hnu lama an man zat atanga tehin, kumin thla nga chhungin tam tham an la man lo hlauh.
Lawmawm deuh mai chu, mihring man zat a tam lo a, meth heti zat an manah hian a neitu mihring zat a tam lo. 2020 atanga kumin May thla thlengin excise force leh police te’n an man zat hi kg 1,122.047 a ni a, ruihhlo heti zatah hian mihring an man zawng zawng mi 123 an ni.
Meth tawlh leh hralah inhnamhnawih an tam lem lo tih a lang a, 2020-ah mi 17, 2021-ah mi 22, 2022-ah mi 71, kuminah May thla thlengin mi 13 an man.
Meth hian Mizoram thalaite a la tibuai lem lo nia ngaih a ni a, a lar hmain inzirtirna a awm hman avangin Mizoram a harh hman nia ngaih a ni.
Mizoram thalaite’n an rui lo nia ngaih a ni chungin meth man tur a awm thin tho thung a, Mizorama meth an mante hi ram pawna mi tur a ni zel tih thu dawn a ni. Mizoram chu a kalkawngah a tang a, a neitu an mante pawh hnam dang an nih deuh zel bakah, Mizo an mante pawh a neitu ni lovin a kengtu an lo ni thin tih thu dawn a ni.
Meth man hnem vak rih lo
Get real time updates directly on you device, subscribe now.
Prev Post
Next Post