Mexico-ah nautihtlak remti ta

Mexico supreme court chuan ram pumin nautihtlak a remti ta a. Kum hnih kalta khan court chuan thutlukna a lo siam tawhah Coahuila state ah chuan nautihtlak a lo remti sa tawh a. Naupaiin a tihtlak vaanga hremna lekkawh chu constitution kalh a lo ti tawh a ni.
Court thutlukna chu Mexico state leh federal sorkar chuan penal code hnukkir lamah an tuanfum hle thung a. Tuna thupek tharah chuan state 32 ah nautihtlak chu phal a ni ta a ni.
Supreme Court chuan hmeichhiate nautihtlak khapsak chu an human rights bawhchhiatsakna a ni tiin a sawi a.
“Pawngsual tawk ni ta se, tu hmeichhia mah nu nihluihtir a rem lo, state emaw an nu leh pa emaw an guardian te pawhin an tih luih theih a ni lo” tiin supreme court head Arturo Zaldivar chuan a sawi a.
“A rights bawhchhiatsakna a nih mai piah lama a tuartu a ni bawk” tiin a sawi bawk.
Mexico City bik chuan kum 2007 daih tawh khan nautihtlak a lo remti tawh a, midangte pawhin an zui zel bawk a.
Mahse nautihtlakna turin facility tha leh tam a awm loh avangin hmeichhe tam tak te chuan harsatna an tawk a, publicity campaign kalpuia a la awm loh vang a ni, tiin women’s right activist Sara Lovera chuan a sawi a. “Hei vang tak hian Supreme Court thutlukna chu a pawimawh em em a ni,” tiin a sawi bawk.
Supreme Court thutlukna chuan mexico a conservative politician te leh Catholic Church te chu a tilawm lo hle tura ngaih niin Mexico hi Latin America a Cahtolic tamna ber dawttu a ni bawk a.
Latin America bikah tun hnaiah nautihtlak lama khuahkhirhna phelh thawl mek zel niin hei hi ‘green wave’ tia sawi a ni a.
Colombia, Cuba, Uruguay leh Argentina ah te chuan elective abortion phal a ni a. Mahse, tun hnaiah Argentina presidential election October thlaa neih tura beiseiawm tak Javier Milei chuan tihtawp a duh thu a tlangaupui thung.
Ram thenkhatte chuan pawngsual emaw nu tan hlauhawm dinhmuna a awm a nih chuan nautihtlak phal ram an awm a, chung te chu El Salvador, Honduras, Nicaragua, Haiti leh Dominican Republic te an ni.