MHIP Day lawmna hmanpui

July 6 kha Mizo Hmeichhe Insuihkhawm Pawl din champha 50-na, Golden Jubilee a ni a, hmun hrang hrangah hman niin, sawrkar hotuten an hmanpui.
Minister Vanlalhlana chuan MHIP Lengpui Branch-ah hmanpuiin, ‘Mizo Hmeichhiate incheina’ tih thupuiah an hmang a. Minister chuan hmeichhiate mai ni lo, chhungkua leh khawtlang tihmasawn tura hma latu pawl chu MHIP a ni, tiin, thupuia hman chu ram leh hnam humhalhna atan thupui pawimawh tak, mahni hnam ziarang chawisan nan leh humhalh nan Mizo puan leh kawr hak uar zel a pawimawh bawk tih a sawi a ni. MHIP Lengpui Branch hian MHIP Day pualin khawchhung tifaiin an hnatlang a, mi harsa tanpuina tur bawm an dawh bawk. Lengkhawm zai, Parlam, Chheihlam leh futsal-in an inel a ni.
MHIP Chhingchhip Venghlun Branch-ah Tuikum bialtu MLA, minister PC Vanlalruata’n a hmanpui a. Chhungkuaah nu an pawimawh a, fate enkawl kawngah pate ai mahin an mawhphurhna a sang zawk a tih theih a, thalai ten sual kawng an zawh lohna turin nuten tan lak nasat a ngai, tiin a sawi. MHIP chu khawtlang tana tangkai, society siamtha tura pawl pawimawh, hmeichhe chawikanna leh humhimna piahlamah khawtlang siamthatna kawnga thawhlawk an ni tih a sawi bawk. MHIP Day lawmnaah hian hnam lam entir niin leh zai ngaihthlak a ni a, an member kum 80 chunglam hnenah chawimawina an hlan a ni.
MHIP Sesawng Branch-ah Chalfilh bialtu MLA, Assembly speaker Lalbiakzama’n a hmanpui a. MHIP hnathawh chu hmeichhiate tan chauh ni lo, hnam pum ang pawha hlu tak a ni, tuia sawiin, MHIP member-te chu nu hlutna leh kan hnamin eng ang mize pu nu nge a mamawh tih hre thar turin a chah. Nunkawng zawha inzir chho mek naupangten nu uapna leh kaihhruaina an mamawh zual bik am an hmuh phaka nu an awm reng a tul tih a sawi a ni. Hemi tur hian khawsak phung inherrem thiam a tul tih a sawi bawk. Chawhnu lamah MHIP Day pual variety programme an hmang a ni.
MHIP Keitum Branch-ah Hrangturzo bialtu MLA, adviser to CM Lalmuanpuia Punte chuan a hmanpui. “Kan faten lehkha an thiam lo ang tih aiin, Pathian an tih lo ang tih a hlauhawm zawk a, lehkha thiam a tha lo ka tihna a ni lo a, Pathian laka kan rochan fanaute kan enkawl danah Pathian thu a laimuah kan dah a tul ka tihna a ni,” tiin MHIP member-te a chah. Tunlai thalaiten mahni inchhungkhur piahlamah hun an hmang tam hle a, nula leh tlangvalte pawh an inrim tawh mang lo niin a lang a, chuvangin nuten kan fate pawn lama an hun hman dan thlenga kan thlithlai a ngai hle ai. Zalenna la hmang thiam lo kan fate thunun loh leh zalen taka kan dah hian dem kan la hlawh let zawk thei a ni tih hriat a pawimawh, tiin a sawi bawk. MHIP Keitum Branch president lo ni tawh chawimawi an nih bakah Keitum khaw chhuak mi hmingthate chawimawina thuziak hlan an ni.