MHIP-in CM thlalak siam dan duh lo Piputen mipa dawihzep an zilhna ani – Congress Thalai

Tunhnaia chief minister thusawi dan a dawih aw an tih avanga Congress Thalai-in a thlalak pawnfen an fentir chu Mizo Hmeichhe Insuihkhawm Pawl chuan hmeichhe thuam hmanga indeuna nia an ngai tih an sawi a. He thil thi piputen mipa dawihzep chunga an zilhna changchawia an tih a ni tih Congress Thalai chuan an sawi.
MHIP Gen. Hqrs. hruaitute chuan, tunhnaiah hmeichhe thuam hmanga insawisak leh indeusawhna a thleng nia sawiin, hmeichhiate hnualsuatna leh hmuhsitna tawngkam hriat tur leh chhiar tur a awm chho nawk bawk a. Mizo hmeichhiate rilru a na in, pawi an ti takzet tih a sawi.
Hmanlaiin, Mizo mipa chu ral leh sa hmaa zam ngai lo, chhungkua leh khawtlang tana thlamuanpuiawm leh mawhphurtu an ni thin, tiin, chu’nga mawhphurna hlen thei lo leh tlanchhia chu, “pawnfen fentir tlak i ni” tia an lo sawi thin chu, vawiinah chuan, Mizo nunphung a lo danglamin, ral leh sa, a hring a hrana beih tur a awm tawh loa, khang hunlaia tawngkam hman kha vawiinah chuan hman emaw a taka lanchhuah tirna chi emaw a ni tawh lo hulhual tih an sawi.
“Kan hnam, Mizo hnamin hmasawnna nasa tak a nei a, a bikin, hmeichhiate ah nasa takin hmasawnna a awm tawh a, hmeichhe thawmhnaw hmanga indeusawh hi tih loh tawp tur a ni. Politics a ni emaw eng thilah pawh nise, kan insawisa in kan indeusawh duh a nih pawhin, hmeichhe thawmhnaw hmanga tih a nih chuan, hmeichhiate hi kan dam thei ngai dawn loa, kan pawm thei lo. Chuvangin, hmeichhe thuam hmanga insawisak leh indeuna hi thleng tawh lo se kan ti,” an ti.
Hemi chungchangah hian Congress Thalai Hqrs. thuchhuak chuan, August 4-a programme an hmannaah chief minister Pu Lalduhoma’n mipui benghriat tura a thusawi dawihzep tak avanga lungawi loh an lantir kawngah Mizo hmeichhiate rilru an lo ti na palh a nih chuan ngaihdam kan dil tih a sawi.
Hetihlai hian Mizoram tana pa berin dawih aw a chhuah reng mai chu pawi an ti a, Mizo piputen mipa tlaktlai lo leh dawihzep, ral leh sa hlauhawm laka nunau leh khawtlang chhan ngamlo chu, “pawnfen feng tlak an ni” an lo ti thin tih sawiin, ‘Mizo piputen mipa dawihzep an zilhna changchawiin, kan ram lal ber chief minister, min thlamuantu ber tura kan ngaihin a insawithaih leh dawih aw a chhuah thin hi sim se kan duh takzet a. Chumi avang chuan a thlalak pawnfen kan fentir a, hmangaihna thinlung nen kan zilh a ni,’ a ti.
Mizo hmeichhiate hmuhsitna avang emaw dahhniamna avanga he thil hi ti an ni loa, hmeichhe zahawmna tihbawrhban tumna leh hmeichhe thuam deuhsawh tumna pawh a ni loa, Mizo hmeichhiate rilru natna tur a awm loa, rilru na palh an lo awm a nih pawhin an ngaihdamna an ngen tih a sawi a ni.
Congress party chuan hmasang atang tawhin hmeichhiate dinhmun chawikannaah, chak zawka hma an sawnna turah, an dikna leh chanvo humhim a nih theihnan nasa takin hma a lo la tawh thinin a la mek zel a. Hmeichhe hmakhua tha zawk a awm theihnan theihtawp an chhuah zel dawn tih a sawi bawk.