MHIP-in kum 50 tlin an lawm

Mizo Hmeichhe Insuihkhawm Pawl chuan kuminah kum 50 a tling ve ta a, July 6 khan Golden Jubilee hi hmun hrang hrangah hman a ni a. Sawrkar hotuten hmanpuiin, Aizawlah chuan minister K Sapdanga hoin Sipai Lammualah hman a ni.
Kum 50 chhunga MHIP-in vantlang tan hna ropui tak a thawh avangin K Sapdanga hian lawmthu a hrilh a. Mizorama tlawmngai pawl chu missionary-te hrin an ni tlangpui, tiin, an thil tum, an thiltih thinah mahni mihringpuite thatna tura rawngbawl sak a tel vek tih a sawi. Khawtlang thatna atana hmalak danah pawl pakhat tana thawh remchang, pawl dang tana remchang lemlo a awm thin a; MHIP chuan YMA leh MUP tana tih rem si lo, hna pawimawh tak tak tlawmngaia tha leh zung senga an neih ang ang sum leh pai sengin an thawk tih a sawi a ni.
Hmanpuitu dang, minister Lalrinpuii chuan, tunhma lamin Mizo hmeichhiate zingah chhan ngai, tanpui leh humhalh ngai ngawih ngawih an tam thin a, tunhnu ah chuan Mizo hmeichhiate dinhmun a tha tawh viau a, heng hi MHIP-in a langsar leh langsar loah pawh hma a lakna zar a tih loh theih loh, tiin a sawi. Chutih rualin hmun thenkhatah, a bikin state pawna hnathawk tura kal zingah Mizo hmeichhia harsatna tawk an awm thin a, hmasawn zelna tur a awm tih hriat pawimawh tih a sawi a ni.
MHIP member hnenah ruihhlo do turin chhungkua atanga bul tan a pawimawh tih Lalrinpuii hian sawiin, “Ruihhlo avangin kan hnam a damlo a, sawrkar, kohhran leh NGO ang zawng pawhin nasa taka ruihhlo doa hma lak a ni. Chhungkua hi naupang leh thalaiten awm nuam ti se, ruihhlo bawiha tang lo turin kan fate kan chhanchhuak thei ang,” a ti.
MHIP Day pual hian chief minister Lalduhoma pawhin thuchah a siam a. MHIP kum 50-na chamah Mizoram leh ram danga cheng MHIP member zawng zawng duhsakna chibai a buk tih a sawi a. Ram leh khawtlang tana hna a thawh that avangin MHIP hian Nari Shakti Puruskar Award chu kum 2016 khan a dawng tih a sawi.
“Mizote hian kan pi leh pute atang tawhin hmeichhiate duat takin kan enkawl thin; kan tawngkam tam takah a langchhuak a, hmeichhia kan dah hmasa zel thin. Thalaite sawi nan ‘nula tlangval’ kan ti a; thlahtute sawinan ‘pi leh pu’ kan ti a, inneite chu ‘nupa’ kan ti a, mi zawng zawng huap kan sawi dawnin ‘a hmei a pa’ kan ti. Mipa kan lam hmasakna tawngkam hi chu thil tha lo lamah hmingchhiatna lam rawngkaiah ‘mipat hmeichhiatna’ a ni,” Lalduhoma hian a ti a. MHIP Golden Jubilee-ah hian Zofaten hmangaih taka hmeichhiate enkawl leh chawikan chu kan hnamzia a ni tih hre thar turin a chah a ni.