Mi 10-te la vui lo, post mortem report la nghak

CRPF te kah hlum, Zo hnahthlak mi 10-te ruang chu Lamka-a District Hospital-ah dah a la ni a, post mortem report an hmuh hma chu vui an tum lo.
Mi 10-te hi Manipur-a Jiribam district-ah November ni 11 khan CRPF te’n an kap hlum a, ni 14-ah post mortem zawh fel niin, ni 16 khan Lamka thlenpui an ni. Mahse vui liam an la ni lo a, zan tin an la tlaivarpui.
Silchar Medical College-ah post mortem hi tih a ni a, ruang hi Mizoram kaltlanga lirtheia phurha Lamka panpui tum a nih laiin Manipur sorkar leh sorkar laipui duh danin helicopter hmangin Lamka phurh thlen an ni. Lamka-ah hian District Hospital-a ruang dahna inah dah nghal a ni a, post mortem report an hmuh hma chu vui lova dah an tum a ni.
Damdawi in kawtah chhun zan zawmin mipuiin ruangte hi an thut chilh a, zanah pawh an tlangvarpui. Khua leh veng an inkal chhawk a, a chang chuan kal an thahnem a, engtia rei nge thut chulh a ngaih dawn a hriat loh tiin an inkirtir chang te pawh a awm tih thu dawn a ni.
Manipur-a Zo hnahthlak hruaitute chuan post mortem report hi hmuh ngei an duh thu an sawi a, nunna chante’n sawisak leh hliam an tuar dan, an dinhmun tak hriat an duh thu an sawi a, hei hi Manipur sorkar leh India sorkarin a remti lo tih an sawi bawk.
Post mortem report hian nghawng a nei thui viau thei tih an sawi a, CRPF te hi rawva takin an che tih finfiahna a ni thei tih te, CRPF te hnena ‘order’ petu hi tu nge tih te, chutiang chu a nghawng theih avangin thuneitu lam hian post mortem report hi thup an tum nia a lan thu te an sawi.
Post mortem report hi chawlhkar khat vel an nghak ta a, han nawr dan vak an hre lo a nih pawhin nghah zel an la tum. Nilaini khan Zo hnahthlak MLA-te leh tlawmngai pawl hrang hrang hruaitute an inkawm a, an thil rawt erawh hriat a ni lo.