Mi 113-in nunna chan tawh

Manipur state-ah Zo hnahthlak leh
Meitei an indo a, Meitei-in Zo hnahthlakte ram an chuh vanga buai an ni. An inbei a ni mai lo a, langchangin an indo mek. He thilah hian Zo hnahthlak lamah mi 113-in nunna an chan tawh tia chhinchhiah a ni.
Zo hnahthlak pawk hrang hrangte intelkhawmna Indegenous Tribal Leaders Forum (ITLF) te’n an chhinchhiah danin, July ni 13 thleng khan hriat theih chinah Zo hnahthlak mi 113-in nunna an chan tawh a, hei hi nunna an chan tih hriat chian, tute nge an nih tih hriat chian chin an ni.
Manipur-ah hian Zo hnahthlak peng hrang hrangte’n mahni pualin pawl an nei a, hhalai pawl, zirlai pawl leh hmeichhe pawl an nei tlangpui. Chung pawl hrang hrangte chu ITLF-ah hian an inthlungkhawm a, he pawl hi tuna an buaina hrinchhuah a ni.
ITLF-in an chhinchhiah danin, Meitei-in khaw 197 an hal tawh a, in 7000 an tichhe tawh. Biak in 359 an tichhe tawh tiin ITLF hian an chhinchhiah a, mi 41425-in mahni in leh lo an chhuahsan tawh tiin an chhinchhiah.
Mizoramah Manipur-a Zo hnahthlak 12,400 chuang an tlanlut tawh a, Manipur state chhunga Zo hnahthlakte khuaah Zo hnahthlak engemaw zat an tlanchhe bawk a ni.
Mizorama tlanchhia hi a tir lam angin an tam tawh lo a, ni khatah tlem tlema lut an la awm. Tun hnai te-ah hnam leh hnam inbei hi an dai deuh a, silai puak ri te chu hriat tur awm tho mah se nasa bur bur a nih rih lo tih thu dawn a ni.