Mi 12 in vawrh vir khumin record siam

Barani flip an ti a, skate-a tawh chungin sang taka invawrh vir a ngai a, boruak-ah vawi khat tak an vir chhuak hman tur a ni a, an kein an ding leh chat tur a ni bawk. Tleirawl kum 15 mi, Mia Peterson chuan a thiante mi 12 bawh tlar tirin, chung ho chu a barani flip khum ta a ni.
Mi 12 a barani flip khum theih avang hian he California tleirawl hian Guinness World Record a siam ta a ni. A record siam hi July ni 16, 2022 ami daih tawh kha a ni nain, Guinness World Record hi August ni 8, 2023 khan record a siam thu hi an puang chauh a ni.
Mia hian hmeichhe naupang kum 11 mi a nih laiin a skate hmasa ber chu a pianchampha lawmna thilpekah a dawng a, kum 13 a tlin chuan skating nuam a ti tawh hle a, trick chi hrang hrang pawh a zirthiam nual tawh a, chung zingah chuan barani flip pawh hi a tel a ni.
Barani flip hi thil awlsam a ni lo a, Mia pawh hian a zir nasa hle a, tum khat phei chu a zirnaah chesualin a khabe a tauh kak duai mai a, hmun 27-ah an thui sak nghe nghe a ni, tum khat leh pawh a dulin a tla phek thlawp mai a, a nakruh te a sawh tliak nghe nghe a ni.