Mi 37-in Imphal chhuahsan ve leh
Midang 68 lakchhuah ngai la awm
Manipura buaina chhuak avanga Imphal leh a bulhnaia Mizoram mi tangkhang, Mizoram sawrkar hmalaknaa hruai haw hna thawh mekah Thawhtanni khan mi 37 chuan Imphal an chhuahsan a, a hnuhnung ber atan vawiin – Thawhlehni hian mi 29 chhuak leh tura ngaih a nih laiin, a tira in report lo, an haw dan tur ngaihtuah ngai Mizoram mi 68 an awm belh.
Mizoram sawrkar ruahman angin Thawhtanni khan domestic flight pathuma ticket an book hmangin mi 37 chuan Imphal chhuahsanin Guwahati an thleng a. Vawiin, May 9 hian a tirah mi 28 an chhuak ve leh anga, heti hian sawrkarin in report tura a tih anga in report chin chu inthiarchhuak zo tura ngaih a ni. A hnu ah mi pakhat dang hriat belh niin, vawiina Imphal chhuahsan tura ticket book sak chu 29 an ni ta a ni. Thawhtanni leh Thawhlehnia Imphal chhuahsantute ‘flight’ hi Guwahati-a tum tur ve ve a nih avangin Guwahati an thleng phawt anga, heta tang hian Mizoram pan leh tur an ni.
Tuna Mizoram sawrkarin ticket a tihfel sak sa te bakah hian midang, Imphal damdawi in thenkhata inenkawl mekte leh Mizoram mi leh sa dik tak la in report lo hrim hrim mi 68 hmuhchhuak thar leh an ni tih Home commisioner H Lalengmawia chuan a sawi a. Heng te hi Thawhtanni – May 8 khan an tangkhang tih hi sawrkar beng a thleng chauh a, an tan domestic flight-ah ticket book turin nilengin theihtawp an chhuah nghal a, tlai lam thleng kha chuan a la hlawhtling thei lo tih a sawi.
Hetihlai hian Pathiannia Imphal chhuahsana Kolkata thleng, heta tanga Mizoram lam rawn pan leh
mi 52 chu Thawhtanni khan Lengpui Airport an rawn thleng a. Airport-ah lo minister Er. Lalrinawma hoin sawrkar hotu thenkhat leh tlawmngai pawl hruaituten an lo hmuak.
Rawn haw zing ami RIMS Imphal-a MBBS zirlai, All Mizo Students Union president Immanuel Lalngaihmanawma chuan Mizoram sawrkarin a ngaihvennaah leh a buaipui danah sawisel tur leh vuivaina engmah an neilo a, an lawm hle tih a sawi. Social media thenkhatah Mizoram sawrkar che muang leh hma la tha tawk lo anga demna awm chu a diklo tih sawiin, RIMS zirlai zingah phei chuan state dang zirlaite nen an chhuak rual reng a, Mizoram sawrkarin chak taka hma a laksaknaah lawmawm an tih thu a sawi a ni.
-- Advertisement --
(HETA TANG HIAN PHEK HNUNG LAMA DAH TURIN)
Sawrkar aiawha lo hmuaktu minister Er Lalrinawma chuan, Manipur-a buaina chhuah tantirhah chief minister Pu Zoramthanga’n Manipur chief minister be nghalin remna leh muanna Manipur-ah a awm theihna’n theihtawp chhuah a inhuam tih a hrilh a, chu mai niloin Union Home minister Amit Shah be nghalin theihtawp chhuah turin a ngen a. Chutih rualin Mizoram sawrkar chuan Mizoram mi Manipur-a awmte lakchhuah dan tur nasa takin a ngaihven nghal tih a sawi a ni.
Mizoram Home department hotuten theihtawp chhuahin office chawlh pawh nei loin kan mite haw theihna turin tan an la tih a sawi bawk.
Tun tuma minister hoa hmuah mi 52 te hian Pathianni tlai khan Imphal-Kolkata thlawhna service hmangin Kolkata an thleng a. Kolkata Mizoram House hotuten lo dawngsawngin, Thawhtanni chawhma dar 10.30 khan Kolkata chhuahsanin Mizoram an rawn lut a ni.
Mizoram rawn thlengte hi RIMS-a zirlai mi 37 leh chhan hrang hrang vanga Imphal-a tangkhang mi 15 an ni a. Imphal- Guwahati flight a Pathianni zinga Imphal chhuahsan, Pathianni tlaia Guwahati atanga bus-a rawn haw mi 25 pawhin tluang takin Aizawl an rawn thleng tawh a ni.