Mi chengte intluktlanna ber ram palinaah India kai

Mi chengte intluktlanna ber ram palinaah India kai
India chu kum 2011-12 dinhmun atanga 2022-23-ah chuan intluktlanna kawngah hma a sawn nasa hle a, World Bank-in report a siam tharah khawvel pumah palina a hauh.
India hi rethei uchuak tak awm zat an tlahniamin a dinhmun a tisang a, 2011-12-a 16.2% awm chu 2022-23-ah chuan 2.3% chauh a ni tawh.
Kum 10 liam ta chhungin sorkarin intluk lohna awm thin tihtawp tumin a bei nasa a, scheme leh vantlang chawikanna tur thil tam tak a kalpui.
Gini Index an tiha India aia hmu sang chu Slovak Republic, Slovenia leh Belarus chauh an ni a. An hnuaiah khawvel ram lian leh hausa – China, USA leh United Kingdom an awm.
“…India Gini Index chu 25.5 a ni a, khawvel pumah ram intluktlang ber palina an ni a, Slovak Republic, Slovenia leh Belarus hnuaiah a awm a ni,” tiin World Bank-in thu a chhuah.
Gini Index hi ram khata chengte sum lak luh intluktlan dan, chhungkua leh mi mala hausakna insem darh dan intluk dan tehna a ni a. A hlutna hi 0 leh 100 inkara teh a ni.
0 chu intluktlang ber a ni a, 100 erawh chu mi pakhatin sum lak luh, hausak leh thil hman ral a chang vek a, mi dangin chang ve lovin an intluktlang lo hle tihna a ni a. Gini Index a san chuan a mi chengte an intluktlang lo hle tihna a ni.
China chuan 35.7 hmuin US-in 41.8 a hmu bawk a. World Bank-in ram 167 a tehna report a tihchhuahah India hi intluktlan lohna ‘hniam pangngai’ huangah a dah a, hemi huanga Gini Index-a 25 leh 30 inkar hmu tihna a ni a. ‘Intluktlanna ram’-a tel phak turin point tlem chauhvin a tling lo a ni.
Sorkarin retheihna tibo tura hma a laknain rah tha a chhuaha ngaih a ni a. World Bank-in a report dan chuan kum 10 liam ta chhung khan Indian maktaduai 171 chu retheihna atanga chawi chhuah an ni.
June, 2025 thlenga khawvelin ‘rethei uchuak’ tia a sawi huanga mi, ni khata $2.15 nei pha lo chu India-ah hian kum 2011-12 khan 16.2% an la awm laiin 2022-23-ah chuan 2.3% chauh an awm tawh a ni.
Khawvel pumah intluktlan lohna ‘hniam pangngai’ huangah hian ram 30 chauh awmin heng zingah hian European ram hausa, vantlang enkhawlna tha tak tak nei an tam hle a. Iceland, Norway, Finland leh Belgium te pawh an tel a. Eibara ram thang chak tak, Poland leh ram hausa, United Arab Emirates pawh a tel.
Kum 10 chhunga heti taka India-a intluktlan lohna a bo chhan hi sorkarin scheme neih hrang hrangten mipui a chawikan vangah mi thiamten an ngai a. PM Jan Dhan Yojana, Direct Benefit Transfer, Stand-Up India leh a dang tam tak chu intluktlanna thlentu lian niin an ngai a ni.