Damlote enkawlna hmunpui pahnih Zemabawka Cancer Hospital leh Zoram Medical College chu mi harsate ban phak a ni leh hmasawnna a neih chhoh zel avangin lawmawm an tih thu MNF Thalai chuan an sawi.
MNF Thalai Hqrs. thuchhuak chuan tunhnaiah MNF Thalai hruaitute hian Mizoram State Cancer Institute (MSCI) Zemabawk hmasawnna a hmunah an en a. Cancer inenkawlna dawng turin state pawn atang mai bakah rampawn atangin an lokal a, tunhma lama Mizo cancer natna veiin phailam an panna thinah state pawnlam atanga Mizoram an rawn pan ve ta hi MNF sawrkar Pu Zoramthanga kaihruaiin nasa taka hna a thawh vang a ni tih a langchiang tih a sawi a. Hlawhtlinna thleng tura Health minister Dr R Lalthangliana thawhrimna an chhuang takzet tih a sawi a ni.
‘MSCI Zemabawkah hian cancer enkawlna chikim a awm tawh a. Cancer hemna khawl lian – Truebeam Liner Accelerator (LINAC), mihring taksa khawilai pawh hem theihna, cancer awm dan azir zela hem theihna hi mi harsa zawk, BPL chhungkaw tan inenkawlna man awm lo te a awm a. Heng bakah hian cancer inenkawlna tha leh changkang tak tak, Canada siam cancer hmuhchhuahna khawl, X-Ray simulator, India rama la awm ngai lo, Mizoram chauhin a neihte pawh kawl a ni,’ a ti. Kumthar lama hawn mai tur cancer damlo chitin reng hem theihna – Cobalt Therapy pawh an kawl tawh tih a sawi.
MSCI-ah hian nitin OPD ah doctor 9 an thu a, nitin damlo mi 50 chuang inentir awm reng ang leh khum 50 awm chu engtiklai pawha luahkhattu an awm reng tih MNF Thalai hian an sawi bawk.
ZMC Falkawna sawrkarin hmalakna tam tak a neihah natna hrik chi hrang hrang hmuhchhuah theihna khawl – Genomic Sequencing machine, USA siam, hmarchhaka awmchhun chu ZMC ah tangkai taka hman mek a ni tih MNF Thalai hian an sawi a. MBBS zirnaah zirlai 500 an awm mek a, damlo mutna tur khum 470 awmin, ICU khum 35 a awm a. MBBS zirchhuak 100-in internship an ti mek a; ZMC doctor indaih lohna a phuhruk tha hle tih a sawi.
Faculty 145, staff nurse 296 leh thawktu hrang hrang 51 an awm a. Non teaching doctor 26, para medical staff 78, administrative 179 niin thawktu 724 an awm tih a sawi. ‘Sawrkarin ZMC tan hmalakna lian tak tak a nei mek a. Man chawia hman theih tur cabin room 60 sak leh, doctor internship ti mek room 60 awmna tur sak a ni a, zawh a ni tep tawh. MNF sawrkarna hnuaiah mipui ban phak turin sawrkarin mipui tan hna a thawk zel a ni,’ thuchhuah hian a ti
Mi harsa ban phak Cancer Hospital leh ZMC-in hma sawn – MNF Thalai
Get real time updates directly on you device, subscribe now.
Next Post