Mi harsate tan ‘Red Kettle’ kalpui tan

Mi harsate tan ‘Red Kettle’ kalpui tan
The Salvation Army chuan khawvel pumah kum 134 chhung an kalpui tawh, Krismas dawn apianga mi harsa tanpui ngaite tana bawm (Ketli Sen) dawha khawlaia rimawi an tum thin – Red Kettle service chu Mizoramah pawh an kalpui leh mek.
Kumin atana Red Kettle hi November 5 zan khan India Eastern Territory-a territorial commander Col. Lalbulliana chuan Woodland Hills Aizawlah a hawng a, Inrinni atang khan Mizoram hmun hrang hrangah he service hi kalpui nghal a ni.
Kumin hian Aizawla Corps Band hrang hrang 27 chuan Aizawl DC remtihnain veng hrang hrangah Inrinni apiangin Red Kettle hi an kalpui dawn a. December 20-ah a hmawrbawk a ni anga, sum lut zawng zawng hi veng hrang hrangah, khawtlang hruaitu YMA/ Local Council-te rawn chungin a mamawhtute hnenah an sem chhuak dawn a ni.
Salvation Army hian nikum Red Kettle service-ah khan Rs. 4,15,255 an hmu chhuak a, kumin hian mipui khawngaihna azarah nikum aia tam hmuh chhuah an tum a ni.