Mi khawihrawn chhuichianna turah doctor-ten magisterial enquiry phut

Mi khawihrawn chungchangah doctor-te chuan magisterial enquiry la turin sawrkar an phut.September 21 zan khan Durtlang Leitanah mi khawihrawn an ni a, a tuartute hi Synod Hospital-a thawk lai doctor pahnih an ni. Pawikhawihtua puh zingah hian police a tel a, he thil chungchang chhuizuitu police chuan Synod Hospital thawktute leh kut tuartute hmaah thubuaia la lo tura a tihnaah an tana hlauhthawnawm thei thil a awm palh a hlauhpui thu te a sawi tih sawichhawn a ni. Hei hi doctor-te chuan duh loin magisterial enquiry la turin sawrkar thuneitute an phut a ni.
September 21 zan dar 11-12 inkar khan Durtlang Leitanah car pakhat chhunga thu mi pahnih chu thian hoin hnukchhuakin an khawih rawn a, an thian pakhat pawh khawih tel a ni.
Thudawn danin, hemi zan hian Leitanah hian intibuai an awm a, chuta tel ve nia an hriat pakhat chuan car chhunga thu mi a biak lai chu pawikhawihtua puhte hian va nangchingin, mi a punah an ngai a, car chhunga thu mi pahnih chu hnukchhuakin an khawihrawn ta vak mai nia sawi a ni.
Kut tuartu mi pahnih hi Synod Hospital-a thawl lai, an duty zawh hnua helai hmuna awm Dr Rinngheta Renthlei, Durtlang leh Dr Laldinliana Sailo, Zemabawk North an ni a. Anmahni bekbawrtu nia sawi hi Lalthlamuana, Durtlang Mel-5 a ni.
Dr Rinngheta Renthlei hi an khawih nat ber a ni a, a lu ah hliam na tak a tuar a, a kawr pawhthler sak a nih bakah a taksa hmun dangah pawh kut thlak a ni. Dr Laldinliana Sailo pawh hian hliam a tuar nual a, Lalthlamuana hian hliam tenau a tuar bawk.
Kut tuartu zing ami Dr Laldinliana hian Bawngkawn Police Station-ah FIR a thehlut a, police-ten an bawhzuinaah pawikhawihtua puh mi 6 – Lalmalsawma Zote (25) s/o Vanlalruata Zote; Mark Zairemmawia (24) s/o Lalsiamkunga; Lalvenpuia (22) s/o Rinchungnunga; Vanlalpekhlua (23) s/o H Thangzela (L) leh K Vanlaltharzela (23) s/o K Ramengmawia an vai hian Ramhlun North vek leh Sailianpuia Sailo (28) s/o Lalremruata Sailo (L) Venghlui te chu man an ni a, thubuai siamsak niin, an thubuai awrh hi bail theih (bailable offence) a nih avangin bail-a chhuah tir an ni.
Pawikhawihtua puh zinga – constable Sailianpuia Sailo hi police, tuna Sairang Police Station-a awm mek niin, a chungchangah disciplinary proceeding kalpui nghal a ni a; Aizawl SP chuan 2024 September 24 khan a hna atanga chawlh lailawk tir (suspend) a ni.
Indian Medical Association Mizoram State Branch chuan he thil thleng hi an dem tih an sawi a. Mipui rawngbawltu, pawisawi lo chunga rawng taka kutthlaktute chu dan anga na taka hrem an phut tih sawiin, magisterial enquiry din turin sawrkar an phut a. An beisei anga hmalakna a awm lo a nih chuan a tul angin hma an la dawn tih an sawi.
Synod Hospital doctor-te pawhin thuchhuah siamin, an thawhpuite chunga rawng taka kutthlaktute an demin, dan anga na taka hrem an phut thu leh sawrkarin magisterial enquiry a din ngei an beisei tih an sawi.
‘Medico legal case (MLC) injury report la tura, September 23-a Synod Hospital Durtlanga police lokalin kan casualty doctor leh kuttuarte hma ngeia vauna tawngkam a rawn nei hi hriatthiam har kan ti a. Doctor zawng zawng leh institution zah lohna nasa tak niin kan hria a, a chungah pawh action la turin sawrkar kan phut a ni,’ an ti.