Mi suamtu pahnih police-in zawng

On Oct 9, 2025 4 0

Mi suamtu pahnih police-in zawng
Tunhnaia mi suamtu zinga tel, an suamte atanga an lak sumfai nena bibo mek mi pahnih chu Mizoram Police-in an zawng mek.
Lunglei District SP J Lalmuankima’n thuchhuah a siam danin, kumin September 30 zan dar 8.00 – 9.00 inkar khan Mongkhoisu (62) Rakhine Myanmar leh tawnglettu atana a hman, Teatei Mong Tongchangya (45) Longpuighat, Lawngtlai district chu Mahindra pik-up MZ-07A 0106 hmangin, lirthei neitu leh khalhtu Sujit Chakma (36) Kamalanagar-II, Lawngtlai district nen Silchar pan turin Lawngtlai atangin an chhuak a. Lunglei district khua Zotuitlang leh Haulawng inkara an tlan laiin, kawng laiah mi tu tih hriat loh mi 5 vel, hmaituamten pistol nia hriat leh chemte kengin an lo tiding a. An chuanna lirthei windshield an tihchhiat sak a, Mongkhoisu bag-a sumfai cheng nuai 10 leh document bakah Teatei Mong mobile phone leh Rs.10000, driver Sujit Chakma mobile phone leh Rs. 5000 an chhuhsak.
Report an dawn angin, hemi chungchangah hian thil thlenna hmun hi Lunglei Police chuan an tlawh nghal a, hnu chhuina atana thil tangkai thei awm enfiahin, a tul anga bawhzui a ni a. Lunglei Police Station-ah thubuai ziahluh a ni.
Police-ten an chhuizuinaah mi pali – Mithun Chakma (37) Udalthana-I, Lawngtlai district; Subaranta (40) Ajasora, Lawngtlai district, tuna Thingkah Lawngtlaia khawsa; Sandip Kumar Chakma (21) Borkolok, Lawngtlai District, tuna Thingkah Lawngtlaia khawsa; Sujit Chakma (36) Kamalanagar-II, Lawngtlai district chu man an ni. Sujit Chakma hi suam tawk lirthei khalhtu kha niin, ruahman lawk sa (pre-plan) fel tak hnuaia thil thleng nia hriat a ni.
Pawikhawihtu zinga tel dang mi pahnih – Santi Prasad leh Niramodin Chakma chu an chin hriat a ni loa, an ni hian an sum laksak hi an kawl nia hriat niin, man turin police-ten theihtawp an chhuah mek.
Heng mi pahnih hi an awmna chin hria leh lo hmu chuan police station hnai berah a rang thei anga hriattir turin Lunglei Police hotuten an ngen a. He case kaihhnawihah hian Mahindra Bolero pik-up an hman leh a suamtuten an hman scooter Suzuki Access MZ-01W 2872 pawh man a ni.
Bungraw keng sumdawng leh mipui zin veivakten harsatna an tawh lohna turin sumfai tam tham keng lo turin Mizoram Police hotute chuan mipui an ngen a ni.