Mi tha Chu Le

Lalchhandama Colney
Ph – 9862982321

Mi tha leh felte hi chu khawi hmunah pawh kan mamawh theuh mai, hetih lai hian mi zawng zawng an fel lo, tha lo kan tihna a ni chuang lo. Pathian kan biaknaah te, hna kan thawhnaah te, ro kan relnaah te, han kaihruaitu tur tu emaw kan mamawh thin. Chung mite chu tlema thluak tha deuh, experience lo nei tawh emaw an ni thin. Khawtlang hruaitu, thalai hruaitu kan thlannaah te pawh hian kan inchuh ve nasa thei hle, chutiang khatiang chu tih ka tum a, chumi chu ka tlin chuan ka ti ang, ti tein vote kan zawng thin. Heng a thlan chhuahte hi a then chu fel lo ve tak tak, rin ang leh beisei ang ni ta lote pawh an awm ve thin. Inthlang ram kan ni miau a, a changa han thlan fuh loh ve te pawh kha a mak lutuk lem lo ve. A chang chuan mi tha tak te pawh hi han thlang mah ila, tangkai vak ta lo, ho zui ve ta mai mai hi an awm bawk a. Nia, mi tha tak han hmuh te hi chu a har, mi ram hruaitu tha tak tak chanchin te han chhiar chang hi chuan a rualawhthlak duh reng a ni.
Hun Kal Tawh Te – Hun hi chu a kal zel mai, hripui lengte pawh Pathian zarah thil kal tawh nihna lai a awm der tawh mai. Vawiina kan ram roreltu ni mekte pawh rei lo teah hun kal tawh a mi, kan la ti leh mai dawn a ni. P.C. party-in ro a lo rel thin tawh a, Congress party pawhin a lo rel thin tawh a, chutiang zelin MNF party-te pawh. Kan ram dinhmun hrang hrang te han thlir kual la hna an lo thawh that leh that loh chu kan hre thei awm e. Aizawl-ah chuan building ropui leh tha ve tak tak a awm fur a, lirthei pawh a chhuak thar apiang a tam viau zel, mahse, hengte hi thenkhat chuan a ba (Loan)a lei leh sak an ni hawlh hlawm, an ti ve tlat. Zirna lamah hma kan sawn em em, mahse, Silchar kawng a pin chuan kan tam chu a ni deuh der zel mai si. Sawrkarna lo chang tawhtu zawng zawng khan eng nge an lo thawh ber thin le aw, mahni tan, inhaivur nan, eizawn nan mai mai em mi aw, an lo hman thin. Inkalpawhna tha te pawh hi kan mamawh hle mai, hetih hian kawng chhiat em em thu hi kan hre fo mai. Eng pawh ni se, kan ram dinhmun chu a tha lo, leiba ngah kan ni.
Tun Hi A Ni E – Kan hma lawkah inthlanpui a lo awm leh ta reng mai, inthlan hmasate kha chuan ngaihtuah chiang mang lovin vote-te kan thlak vel mai mai a, a rah chhuah an lang tak tak chu hrehawm kan tiin, phun leh ân vak vak bak chu tih theih kan nei tawh si lo a ni. Tuna opposition party lam te hi eng nge an an ang aw, mahse, kan hriat tawh hnu ho tho kha an niin ka hria. Mizoramin sawrkar tha tak, ram hmangaihtu tak tak engtin nge a neih theih ang, aw le, sawrkar tha tak, ram hmangaihtu neih theih hun chu tun hi a ni e. Nakum lamah chuan hun tha a awm tawh lo, a nih nih a ni zo leh vek tawh ang, chuvang chuan sawrkar tha nei thei tur chuan vawiinah tunge i thlan dawn, vote dawn, nangma duhthlanna ngeiah a innghat ta. Ngaihtuahna fim tak kan hman a, kan tun hun (Vote thlak hun) kan hman that theuh a va pawimawh em. Kan hmanthat loh chuan keimahni bawk a ni, a tuartu tur chu. Hun kal tawh atangin kan inen ang a, lo la thleng tur chu beiseina sang tak nen, kan tun hun hman danin a hril dawn a ni.
Engtin Nge Ni Ang – Engtin nge mi tha chu kan thlan chhuah theih ang, kan thenawmte pawh chuti tak chuan kan hre chiang hlei thei hlawm lo chu a ni si a. Lo kal apiangin kan party a tha ber, midang party chu a tha lo, min vote phawt chuan Zoram nuam, intodelh, kan siam dawn, an rawn ti theuh mai si. Nia, political party-te an tang nasa, thenkhat phei chuan eng eng emaw te min pe ang a, min tiam bawk dawn a ni. Party tha ber tur, mi tha thlan chhuah chu a huphurhawm, an tha hlawm vek mai si. Mi zawng zawng khan kan tha ber, ziktluak ber, keimahni lo chu tumah an awm lo, an rawn ti dawn a ni. Aw le, party tha ber, mi tha thlang chhuak thei tur chuan keimahni pawh kan inhuam a ngai, sum leh therhlo, eng eng emaw kan hnar ngam a ngai, kan chan ngam a ngai. Kan theih ang angin an policy leh manifesto-te kan zir chiang ve ang a, candidate hote pawh tute nge an nih hriat tum ve ila. A tawp berah chuan thutlukna tha leh dik kan neih theih nan Pathian hnenah i dil thin ang u, tichuan, tu pawh lo tling ta se Pathian ruatah kan pawm thei dawn a ni.
Mizoram chu Kristian ram a ni na a, ram rethei tak a ni a, kristian ram kan ni na a, fahrah tamna ram, AIDS hluarna, Cancer tamna a ni. Ram hruaitu tha tak tak kan lo nei thin tawh a, sawrkar tha tak tak pawh kan nei fo tawh a ni. Mahse, vawiin thlengin eiruk tamna, intodelh lo, tam mai thei, leiba ngah thin ram kan ni. A awm viau e, chanchinbu leh social media hrang hrangah te sawrkar duhkhawp lohna, phunnawina, sawiselna kan hmu chuai chuai thin. Hetih chhung hian ram tana lo pen chhuak an awm ve ngei ang a, chung mite thlang chhuak tur chuan, phunnawina tawp theih nan, mi tha chu le, i han ti teh ang, mahni tan leh party tana vote thlak lovin, ram tan vote i’n thlak teh ang, mi tha chu le, i han ti teh ang.