Mi thattu damchhung tang dawn

Serchhip mi, a nupui thattu chu court-in thiam loh chantirin damchhunga lung in tang turin a hrem.
Serchhip Dinthar Venga cheng PC Zobiaksanga (35) chu a nupui Rosangzuali (28) thihnaah mawhphurtua puh a ni a. 2022 May 29 chawhnu dar 2.30 leh 3.00 inkar vel khan an nupa kut inthlak thawm hi thenawmten an hria a, hemi hnu hian PC Zobiaksanga hian an in luah chunga awm a nau chu phone-a bia in, a ni hian a zuk enchian chuan Rosangzuali hi an room-ah hliam tuarin a zuk hmu a. An chhungte a hriattir chhawng ve leh a ni. Rosangzuali hian hliam na tak a tuar nia sawi a ni a, an inchhung hmun hrang hrangah an inkhawihna hnuhma nia ngaih hi hmuh a ni bawk.
Serchhip Police chuan PC Zobiaksanga hi an la a, a hnu ah a nupui hi kut a thlak ngei tih a puang a ni a, thubuai siamsak niin, court rel turin thawn a ni.
Additional District & Sessions judge-I Aizawl Ngursangzuali Sailo chuan finfiahna hrang hrang a zirchian hnu ah PC Zobiaksanga hi thiam loh a chantir a, Ningani khan a hremna tur hi puangin damchhunga lung in tang turin a ti.
Rosangzuali hian a fapa kum 3 mi leh fanu thla 6 mi a kalsan a, an khua Lunglengah a ruang hi lak a ni.