“Mi tih beidawn hnu a hmanruaa hman zui tum an awm”

“Mi tih beidawn hnu a
hmanruaa hman zui tum an awm”
Mipui leh thalaite tih beidawn a, chu an beidawnna chu hmanruaa hman tum an awm nia a lan thu MNF party hruaitu J Malsawmzuala Vanchhawng chuan a sawi.
Mizoram University Students’ Council-in MZU Auditorium-a ‘Virthli Talk’ an buatsaiha MNF party aiawhte tel, MNF Publicity Board vice chairman J Malsawmzuala Vanchhawng chuan, mipui leh thalaite tih beidawn a, chu an beidawnna chu hmanruaa hman tum an awm nia lang chu pawi a tih thu a sawi.
“Kan ram chhe ta vek anga sawi te, thalai rual chhe ta vek anga sawi leh, kan politician-te eiruk hmang vek anga chhuahte a awm thin. Hei hi kan ram awm dan dik tak a ni lo. Mitha tam tak karah mitha lo an awm ve a ni chauh zawk,” a ti.
Hun kal tawhah ram hruaituten theihtawp chhuahin ram tan hma an lo la tawh thin a, hma pawh kan sawn ve zel, tia sawiin, “Slum area awm lohna state kan ni te, kawng hrang hranga eizawng tura remchannain a hual vel ram kan nite hi a vanneihthlak a, remna kan neih hlut zia leh vanneihthlak ziate hi chhut ang u,” a ti.
Social media-in Mizote min khawih nasa hle a, social media hmanga kan thu hriatah thlitfim loh information a tam tih J Malsawmzuala hian a sawi. “Tum nei rana thu dik tawk lo thehdarh a tam hle. Hei hian a chhe zawnga nghawng a nei tam hle. Aia upa zahna, Zonun zemawi leh khawtlang inrelbawlna thlengin a nghawng; ram inrelbawlnaah pawh nghawng a nei,” a ti. Mipuiin social media-a kan thil hmuh leh hriatte pawng awih nghal ngawt zel loa buk hmasa a, a dikna hriatchian tum a tha hle tih a sawi a ni.