Mi tlemte a lo awpkhawm thin dan kha Pu Duh-a’n a thanhnan – Zoramthanga

Mi tlemte a lo awpkhawm thin
dan kha Pu Duh-a’n a thanhnan
– Zoramthanga
Chief minister Pu Lalduhoma chu kum 40 vel mi tlemte dictator thuneihna anga a lo awpkhawm thin dan a thanhnan a, chutiang chu sawrkar kalphungah a remchang ve lo tih MNF hruaitu Zoramthanga chuan a sawi.
Thawhtanni Mizo Hnam Run inkhawmah MNF president Zoramthanga chuan, ZPM chu lal leh thuneihna duh luat avanga ropui thei ang bera inlantirin, thiang leh thiang lo pawh pawisa loin thuneihna an lek tih a sawi.
“An hotupa Pu Lalduhoma hi mi tlemte, dictatorial power hmanga lo awpkhawm thang a ni a. Kum 40 hetianga a lokal tawh avangin a thanhnan a. Tlawmngai pawl leh kohhran ho ngaihtheih lohna pawh hi thanhnan thil a ni. Hetianga mahni duh duh dana khawsak hi sawrkarah chuan a lo remchang lo a ni,” a ti.
Forest Conservation (Amendment) Act 2023 dan chu a that leh a chhiat an sawi loa, state thuneihna vawnhim a tul an ti a ni ber tih chief minister hlui Zoramthanga hian a sawi a. He dan an duh loh chhan tam tak zingah international border atanga km.100 huamchhunga state sawrkar rawn loa central-in tul leh pawimawh an tiha kut an thlak thei tur chu a ni, tiin, he dan hman an duh loh thu hi pass kher lo mah se, Peace Accord (Article 371G) in an humhim sa tih a sawi a ni.
“A dil pawh min dil hmain ZPM sawrkar chuan pawnfen hmalam hlimsang sa in, dawih aw chhuahin, a engamah hma in an lo pawmsak a. Kan hnam pasalthate thisena lei chhuah, mipuiin kan tawrh chhuah, kan hnam himna, kan leilung chunga thu kan neihna chabi chu central hnenah an hlan a ni,” a ti. FCAA chu a tawp thlengin an dodal dawn tih a sawi a ni.