Mi tlemte hamthatna aiin mipui nawlpui hamthatna a lal zel ang

Ram tana tha chu huai takin sawrkarin a ti mai dawn a, mi tlemte hamthatna aiin mipui nawlpui hamthatna a lal zel dawn tih chief minister Lalduhoma chuan a sawi. Mizoram Govt. Doctors’ Association (MGDA) chuan Zirtawpni khan Aizawlah annual general conference vawi 39-na an hmang a. Hmanpuitu chief minister Lalduhoma chuan sawrkar hnathawkte chu an ‘entitle’ chinah na na na chuan dan ang takin, duat takin sawrkarin a enkawl a. Chutihrualin mahni entitle baka kal fawr leh duham chungah erawh an thikthu a chhe viau thung tih a sawi.
Service association thenkhat chuan ‘pressure group’ emaw an inti em aw tih theihin an kal tih a sawi a. “Service association hrang hrangin min rawn hmu thin a, ram tana tha tur rawn sawi an vang hle. An pawl tan, an hamthatna atan thu an rawn keng deuh zel. Hei hi bansan ang u. Ram tana tha chu huai takin kan ti mai dawn a, mi tlemte hamthatna aiin mipui nawlpui hamthatna a lal zel dawn. A tul phawt chuan a awmsa pawh kan thiat anga, a thar pawh kan din ang,” Lalduhoma hian a ti.
Sawrkar doctor leh damdawi in duhkhawp lohna thawm hriat tur a awm leh zauh thin tih a sawi a. Thawktute inthlahdahna vanga thleng nia lang thilah phei chuan ngaihtuahna a kal thui thin tih a sawi. Damlo enkawl kawngah tisual thei turah pawh mipuiin kan ngai lo tih sawiin, tuten emaw dik tawk lo deuha an puhna ang chi ah erawh a sawifiahna siam zel thaa a rin thu a sawi.
Ram hmasawnna atan mipui hriselna a pawimawh avangin sawrkar chuan damdawi in leh centre a din a, a vil turin doctor leh thawktu dang a la tih a sawi. Mipui an hrisel theihnan anmahniah sawrkarin investment a kalpui tihna a ni, tiin, investment chu a lo kir leh tur hisapa neih a nih angin, doctor-te pawh ram tana hlawk taka hna thawk turin an beisei tih a sawi a ni.
Health care bill chu dan ang thlapin thawktuten an endik zel a. Sawrkar kum kal mekah dik taka hna an thawh azarah vbch. 14 an hum (save) tawh tih chief minister hian sawiin, “Sawrkar hnathawk leh hospital lamin dik takin bill thehlut thin ila, kan natna dik tak aia uar zawk emaw kan inenkawlna senso dik tak aia sang zawka bill kan thehlut duh hi Pathian hian mal a sawmin ka ring lo,” a ti.
Chief minister-in conference a hmanpui phalna hi MGDA chuan State Election Commission-ah an la tih an sawi a. An rorel zingah, District Hospital tinah mipui tan service (24×7) tha tak pek a nih theihnan emergency service enkawl bik tur doctor lak belh ngei ni rawh se, tih a tel a. Sawrkara thlen thuai nise an ti.
CM thusawi dang:
8 Tunhnaiah MPSC-in doctor 9 lakna result a tichhuak a, health worker 100 lakna tur hi phalna pek vek tawh a ni a, nurse engemawzat lak phalna pek tawh a ni.
8 ZMC-ah Girls Hostel building thar an hawng a, SASCI 2024- 2025 atangin Working Women Hostel pakhat an sa leh dawn. ZMC-a thawktute hi a then society hnuaiah a then sawrkar hnuaiah an awm a, chu’ngte pawh chu tha an ti loa, an zain sawrkarah an lalut vek a ni.
8 Sawrkar tirh khan health care bill tang cheng vaibelchhe 50 vel an pe chhuak nghal a, vawiin thlenga MR bill an pekchhuah tawh chu cheng vbch. 90.28 a tling tawh a ni.
8 Sawrkar hnathawkte theih ang tawkin sawrkarin a duat a. An sawrkar ve hnu, December 2023 atanga January 2025 thleng khan sawrkar hnathawk GPF cheng vbch. 782 an pe chhuak tawh.
8 Pension charge atan vbch. 1278 an pe chhuak tawh.
8 IFMIS kaltlanga MR bill an pek chhuah zawng zawng vbch. 90.28 a tling tawh.
8 Khawzawl, Saitual, Hnahthial leh Serchhip District Hospital kan sa mek a. Mamit District Hospital sak zawh a ni tawh a, sawrkarah an la hlan lo deuh a ni. Lunglei Civil Hospital laboratory kan sa mek a, quarters unit 6 kan sa mek a, Lawngtlai Hospital-ah Dialysis unit kan sa mek a. District hrang hranga Trauma Centre pawh thuamthat a ni.