Miami Open hnehtu thar Sabalenka
Miami Open hnehtu thar Sabalenka
A la champion ngai lohna Miami Open women’s singles final-ah Inrinni zan khan world number one Aryna Sabalenka chuan 7-5 6-2-a tualchhung player Jessica Pegula hnehin kumin chhunga a title pahnihna a hlawhchhuak.
Belarusian hi kumina final lian vawihnih a khelh dang Australian Open leh Indian Wells-ah a tlawm ve ve a,
January thla Brisbane International title chhunzawm turin world number four American lakah hnehna a chang ve leh ta hram a ni.
Tarlan tawh thin angin, kum 26-a upa Sabalenka hi Melbourne khawpuia Australian Open fial-ah khan American player ve bawk Madison Keys lakah tlawmin, Indian Wells final-ah Russian Mirra Andreeva a hneh lo leh a, Miami khawpuiah erawh nikum US Open final-a a hneh hnu lakah a chesual duh ta lo a ni.
Hnehna a chan hnua thu a sawiah Sabalenka chuan, “Sawi tur ber pawh ka hre lo e a; he mi hma chiaha ka final match khelh hnuhnung kha a hautak lutuk a, tuntum final;-ah hi chuan ka match khelhah ka insawrbing tlat a, point khat te te kha ka chhiar kauh kauh zel a, hnehna ka chang leh ta hi Miami khawpuia ka title hmasaberte a ni bawk nen a special ngawih ngawih a, ka hlim over a ni ber,” a ti.
Hard Rock stadium, Miami, Florida-a a title hlawhchhuah kha top-ranked Aryna Sabalenka tan WTA 1000 title pariat a lak tlinna niin, nikum New York khawpuia a Grand Slam final hmasabera a hneh loh Belarusian laka phba lak duh leh mamawh ngawih ngawih fourth seed Pegula tan a tumpui kha hneh ngaihna ngang a la awm rih lo a ni ber a, kum 31 mi American khan bul tan fuh viau mah se Belarusian chakna thahrui kha a khan ngang lo a ni ber.
Sabalenka hian title a hlawhchhuah thleng khan tun Miami tournament lianah set khat mah a hloh lo a; round of 16 lamah champion hlui Danielle Collins hnehin, quarter-final lamah Olympic champion Zheng Qinwen a paltlang a; semi-final stage-ah sixth seed Jasmine Paolini a hneh zui leh.
Inrinni vek khan British pair Julian Cash leh Lloyd Glasspool chu men’s doubles final-ah 7-6 (7-3) 6-3-in top seeds Marcelo Arevalo-Gonzalez leh Mate Pavic tangdunin an hneh.