RK Dawla
Mb 9366095658
-- Advertisement --
1. March thla tâwp kan thleng ta a, 2025 atâna First quarter chu kan hmang zo leh ta dêr. Khua a la sâng tha viau a, romei zâm chûk kârah ni a sa rum tan viau a. Kan Zotlang ram nuam pawh Chhawrpial rûn a iang rih ta lo khawp mai, hawina lam apiangah kan khawro rum mai. Tin, hetia thal khaw ro leh sâ-in duhtâwka kan chhehvel a sawisak zawh chiah hian, fur ruahtui tam mang khengin a chhu zui leh thin a. Mi tam tak chu, thal khawro hmet hnâwng tura ruah a rawn tlâk bâwrh bâwrh hian kan thaw-huai mai a. Mahsela, mi thil chîk mite erawh chu kan thaw dêp dêp thin thung. Khuhtu (thilto) mumal nei lo kan chhehvel leilung leh kan huante chu ruahtui hian nasa fê maiin a sawisa ta thin a. Lei chunglang hâng a kal ral duak duak a, leiin tui a dawnsawn dan a dik loh avangin tuihâwk insemrual lo vangin lei a min huk huk thin. Kum kal tawhte chhût chuan darkar 6 chhunga 100mm ruah a sur tlin tawh chuan, hmun tinah lei a min sen veng vung mai thin. Leiin ruahtui a dawn rêng rêng hian – lei chhungrila pût lût, lei mûr kâra tangkhang leh lei chunglanga luang ral – ahte rualkhai takin a insem rual thin. Heng zinga a engemaw ber hi, chhan engemaw avanga a hleihluak chuan ‘PAWI’ a thleng ta thin. Lei chunglanga luangral a tam chuan, lei chunglang hâng a intleuh tam a, tuihâwk a tam a, kawr-chhia a siamin leihâng kal ral a tam a. Lei mûr kâra chambâng a tam lutuk chuan, a lo rit ta lutuk a, leimin a insiam emaw thlai zung natna chi hrang hrang a hluar thin bawk. Tin, lei chhungrila pût lût a tam lutuk chuan, lei chunglanga thlai leh thiltote eitur tam ber lei mûr sin leh chaw inpawlh kha lei chhungrilah a pût bo (leeching) bawk.
2. thing-tàm (Rawthing tàm) a thleng mêk bawk a, kumin 2025 hi. Tunah hian rawthing kungte chu an pâr tan mêk a. Rah (grains) an chhuah dawn hnai a. Hei vâng hian sazu a nghal tan hle – lo, huan, ramhnuai leh chenna In chhehvelah pawh sazu hnuhma hmuh tur a tam hle. Sazu eitu – Rûl leh zawhte lam kan duat deuh a hun âwm e. Huan neitute ngat phei chuan, a nazawnga rûl kan thah ngawt loh a tha hle ang. Kumin atân chuan thlai tê deuh chu a bul keu fai peih a tul lehzual dawn a. Sazute hian hnim kâra thlai tê deuh chu seh mai an ching êm êm. Duhthusam phei chuan, a khât tâwka sazu hrai zeuh zeuh tan kan ngaih hmel khawp mai – nakin lawka an inthlahpun tak tak hma hian. Sazu hi an tam tak tak chuan, an nghal êm êm a, ei duh loh hi an nei meuh lo thin. Buh leh vaimim lam chauh an khawih lova, thlai dang pawh an ninhlei hian an seh mai thin. Tin, thlai kumhlun phun, la tê deuh chu a kung bul hnai hâi fai deuh a tha, tichuan sazu kam hlei lakah a him deuh.
3. Thingtlangah chuan hmun tam takah eirawngbawl, vawkchaw chhum, inbualna tui lum nân mei kan la chhêm a. Khawpuiah pawh Thingpui dawr leh vaimim rawh nân meihawl kan la hmang bawk. Henga mei kan chhêmna êkchhia, thukvut kan tih mai hi kan la hmang tangkai tam tâwk lo hle. Thlai ching mite tân chuan, thukvut hi paih mai mai chi a ni lova, kan huanah a mual muala thehdarh tur a ni. Thukvut hian lei thûr a tireh mai ni lovin Base saturation a siamtha a ni. A awmzia chu leiah Cations nutrients – Potassium, Calcium, Magnesium a titam a. Tuihâwk tinutu lei mûr sînte hi colloids an ti thin a, hengho hi negative charge an ni a. Anni hi thlai chaw riral mai tur chelhdingtu an ni a. Colloids awm tha mah se, an positive counterpart (Potassium, Calcium, Magnesium etc) leiah a tlem chuan hmeithai mai an ni a, an thawhhlawk hlei thei lo – thlai tân. Chuvangin, huan kumkhun siamte chuan kan leilung da tawh a lo insiam that leh theih nân thukvut theh uar ila. Thlai an hriselin an rah tha duh a, MOP leh Chinai thi aiin a tha zawk daih a ni. Awlsama kan hmuh mai theihte hman tangkai lamah hian, climate smart farmer ni tur chuan, tan kan lâk a tul e.