MIDANG TANA TLUKNA NGE MALSAWMNA

Reuben Lalnunthara Hnamte

Kan Bible chuan Tluknate hi awm lo thei a ni lo; nimahsela, tlukna awm tirtu chung a pik e!(Luka 17:1) tiin alo sawi a. Helai Bible chang kan hmuhah hian Lal Isua hian ringtu ni tawh tluk palh thei a nihzia a sawi chiang hle a. Tlukna chu a awm ngei a ni tih pawh a sawichiang a; nimahsela, midang ti tlutu nih erawh a hlauhawmzia a sawi thung a ni. Midangte tana tlukna siam tu, midangte tana harsatna siamtu nih hi a hlauhawm a ni tih min hrilh a ni. Hei hian thil a huapzau hle awm e. Midangte tana tlukna siamtu kan lo ni ve thei reng mai alo ni a, engtinnge kan nih theih tih hi I han zir chiang dawn teh ang.
Ringtu i ni a, Biakinah pawh iinkhawm fo thin a, a lam te pah i lam thin a ni maithei. Tin, lenkhawmna leh Biak inah te chuan Pathian thuawih ber ber anga lang pawh i ni mahna; nimahsela, i pawnlam nun leh Biakin pawn lama i nun danah chuan mi rel hrat tak, mi sawichhiat hreh miah lo, mi hmuh lem lovah chuan han in zeuh te emaw hreh chuang lo i lo nih chuan i nun dan khan midang tan tlukna a siam thei a ni. Kohhrana hruaitu i ni a, Biak inahte pawh thu tha tak tak i sawi thin; nimahsela, i hlawh leh in khawsakna chu a inthlau em em, sum leh paiah duham chintawk i nei lo va, thiante nena han awmkhawm deuh leh thiltihpui nikhuaiin han lem zeuh i hreh chuang bawk lova, chu chuan midang tan tlukna a siam thei . |halai hruaitu i ni a, Biak in leh thalai thiltih nikhuaa i khawsak dan leh ni tin eizawnna leh pawn lama i awm dan a inthlau em em a, mite leh thalai ten an enthla reng che, nangmah avang khan thalai tam takin an tluk phah thei bawk.
Biak in leh zaikhawm nikhuaa a lam peih peih, a hallelui ring ring ni si, ram kal nikhuaa mi lo va thil; ruk hreh miah lo, inhauh peih reng mai i nih chuan i nundan khan midang tlukna a siam thin a ni. Biakina inhmuamup tak leh kohrana a kula tai ni si, dawt sawi hreh map lo; dawt pawh thudik sawi par par thei i nih chuan midang tan tlukna leh harsatna i siam ngei dawn a ni. Kan ramah hian mi hetiang hi kan awm nawk ni hian a lang a, hetianga ringtu nun leh Kristianna kan la lap a nih chuan ringlo mite leh piangthar lote hnenah engtinnge Chanchintha kan hrilh theih tehlul ang? Kohhrana inhmang leh a kul atai ni si, thawhchhuah phu lova khawsa; thla tina an hlawh lakzat pawh kan hriat riau ruau ni si, an in chhung khawsak dana che sang em em, in leh ropui leh car manto tak tak nena khawsa sang em em lawi si te kan awm nawk a. Hengte hian kan kristianna leh ringtu nun hi a tidal em em a ni. Kan chhehvel leh kan ramchhunga ring lo mite leh piangthar lote hian min enthla reng a, kan nundanah hian ringtu nih leh pianthar chakna tur hi an hmu hlawl lo.
Danialate thian zaho kha chu midangte aiin an danglam ngam a, Pathian thuawih leh ringtu nun dan tur kha an zahpui ve reng reng lo. Babulon lal ina thil tui tak tak ei lo ngam kha, an lo hmeltha zawka an hrisel zawk bawk a nih kha. He khawvel babulon hausakna leh ropuina chentute ai chuan Babulon hauhsakna hnawl ngam leh chan ngam Danialate kha an hmelthain an duhawm zawk. Keini pawh babulon hausakna hnawl ngama an eitur thate kan chan ngam chuan midang tan kan lang mawiin kan hmeltha zawk ang. Kristian ringu kan nih chuan kan danglam ngam a ngai; kalsanna leh chan ngamna nun kan neih loh chuan midang titlutu kan ni thei a ni. Kan ram ringtute hi AWHNA SUAL hian mi tibuai em em mai a, dik taka nun hi kan hlau zawk emaw tih tur a ni. Dikna hi chu a tlo chu kan han ti thin tak na a, a tlo lo zawk dik lohna hi kan thleng leh lawi si. |halai zingah Drugs addict te, zu ngawlvei te kan tam em emna chhan leh mahni intihlum leh rilru buai kan tam em emna chhan pakhat chu – kan chhungkuaa sum lakluh a thianghlim loh vang a ni fo. Dik lo taka sum lalut chhungkua tam tak hi an chhungkua belhchian dawl lem lo an tam. Khehpuam vanga hausa thur thurte, smuggling avanga hausa ta te, mahni hlawh baka sum lalut teuh teuh te hi chhungkaw nuam tak sawi tur an tam kher lovang.
Tun laiah pawh internet leh social media atanga mi bum tum leh bum thin mizo zingah ngei pawh kan lo tam ta hle. Heng ang mite hi an nawmsak rei ring reng reng suh u. Midangte tana harsatna siam a, titlute hi he khawvelah pawh hremna an hmu ang a, an sim loh phei chuan vanah chatuana hremna an la hmu dawn a ni. Midangte tana malsawmna nih hi a va hlu zawk em! Pathianin Abrahama hnenah…” nang malsawmna ni ang che..” (Gen.12;2) ti a a lo sawi ang khan midangte tana tlukna ni lova malsawmna kan nih hian kan tan pawh malsawmna a ni. Lal Isua’n “Heng mi tête zinga pakhat pawh tihtluk ai chuan a titlutu tur nghawngah chuan buh rawt sawmna lung awrhtirin, tuifinriatah thlak sela, a tan a tha zawk ang” (Luka 17:2) ah a ti hial a nih kha. Midangte tana chhiatna thlentu, titlutu nih hlauhawmzia hi kan Pathian thu atang hian i zir nawn leh teh ang u. Ringlomite chu eng ang pawhin lo awm rawh se, keini ringtu erawh hi chuan i thik lovang u. Danialate thianzaho ang khan he khawvel Babulon bawlhhlawh tak lak atang hian i inthiar fihlim teh ang. Ram hruaitute pawh hi midang tana tlukna ni lova malsawmna ni turin tan an lak a ngai.
Kan vul lai nite, kan dam chhungte hi a rei lo ropui mai si a, chhuan thar an lo chhuak zung zung a. Hmanni lawka lalte kha an lo chuai a, midangin an lo thlak leh a, ni tin hian thlanmual lam pan hian kan liam mek a ni. Dam chhung rei lote a nawmsakna thlahlel lo hian vana kan lawmmna tur zawk thlir hian i nung ila, tichuan midangte tan pawh malsawmna kan ni ngei ang. Mi tam tak thlanmual lam pana an liam mek laia keini kan la dam chhan leh mi nunga kan lo la awm chhan chu midangte tana malsawmna ni turin a ni si a.