Middle East-ah boruak sosang

Beirut-a US embassy chuan khua leh tui te chu ‘ticket awm thei ang ang’ hmangin Lebanon chhuahsan turin a ti a, hei hi Middle East-a boruak sosang zel vang a ni.
He mi hnu lawk hian UK Foreign Secretary David Lammy pawhin helai region buaina chu nasa taka chhe zual zel thei a ni tiin a sawi bawk.
Iran chuan kar kalta Nilainia Tehran a Hamas chief Ismail Haniyeh thah a nihnaah Israel lakah na taka phuba lakna kalpui a tum thu a lo sawi tawh a ni. Haniyeh thah a nih hma lawk hian Hezbollah commander Fuad Shukr chu Beirut khawpuiah tihhlum a ni bawk.
Hei vang hian Lebanon a inbun Iran thlawp Hezbollah te chuan phuba an lak ngei rin niin tharum an hmanna chu Israel chuan a chhang ngei dawn bawk si dawn a ni.
Pathianni khan Hezbollah te chuan northern Israel a Beit Hillel khua chu rocket-in an kap zui nghal bawk a. Heng rocket te hi Israel Iron Dome air defence system chuan a lo kap thla hlawm thung.
Jordan Foreign Ministry pawhin a khua leh tui te chu thurawn pein Lebanon-a awm te chuan a rang thei ang bera chhuahsan tura tiin Lebanon a zin lo turin a ti bawk a.
Canada pawhin a khua leh tuite chu Israel a zin lo tura tiin Lebanon ngat phei chu tlawh hauh lo tura ti bawkin boruak sosang tak thleng thei reng a ni a ti bawk.
US embassy thuchhuah chuan Lebanon a cham thlang te chuan ruahmanna tha tawk siamin hun rei tak cham ngai tur anga inpuahchah turin a ti bawk a.
Airline tam tak ten flight cancel-in a then te chu ticket hralh zawh vek tawh a ni chungin commercial transportation hmanga Lebanon chhuahsanna theihna kawng a la kaw reng a ti bawk a.
Pentagon chuan Iran leh a proxy tena Israel an beihna a thlen palhah Israel pui turin warship leh fighter jets rualte a tirlut bawk a.
UK chuan a khua leh tuite thiarchhuah nan military personnel, consular staff leh border official-te a thawn luh belh tira sawiin UK khua leh tuite chu commercial flight la awm lai chuha Lebanon chhuahsan turin a ngen thung.
Middle East region ah British military ship pahnih a awm sa tawh a, Royal Air Force chuan transport helicopter te pawh tul thuta hman turin a chhawp sa tawh bawk. Lammy chuan ‘helai region-a buaina nasa zawk chhuak thei chu tu te mahin an hlawkpui dawn lo’ tiin a sawi.
Pathianni khan France foreign ministry pawhin a khua leh tuite chu a rang thei ang bera Lebanon chhuahsan turin a ti bawk a.
Hetih lai hian Palestinian tena awm nana an hman Gaza-a school chu Israel strike-in deng fuhin mi 17 an thi tiin Hamas te chuan an sawi a.
Israel military te thung chuan Gaza City a Sheikh Radwan a Hamama school chu Hamas tena command centre-a an hman a ni a ti ve thung.
Kar kalta tawp lam khan Israeli minister te chu satellite phone pek vek an ni a, chu chu indona chhuah thuta communication infrastructure-in harsatna a tawh theih laka invenna atana tih a ni.
Kumin April thla khan Iran chuan Israel chu drone 170, cruise missiles 30 leh ballistic missiles 110 hmangin a lo bei tawh a. Chu chu Israelin Syria khawpui Damascus a Iranian consulate a bomb chhanletna a ni.
EU Foreign Policy Chief Josep Borrell nena kar kalta Zirtawpnia inbiakna an neihah Iran Acting Foreign Minister Ali Baqeri Kani chuan Israel hrem a nih theihna turin Iran chuan dikna a nei a ni a ti.
Kar kalta Zirtawpni khan Iran state TV chuan ‘khawvelin thil thleng danglam a hmu dawn’ tiin a lo puang tawh bawk a.
Israeli Prime Minister Benjamin Netanyahu chuan Israelis te chu hma lamah harsatna a awm thei tia sawiin hmun tin atangin vauna kan tawk a, eng pawh thleng thei dinhmunah dingin kan inpuahchah tur a ni, a ti.
Israel leh Iran inkar boruak sosanna chhan ber chu Israeli awp Golan Heighs a missile hmanga Israeli naupang 12 infiam lai kahhlum atanga intan a ni a. Israel chuan Hezbollah te thiltih a ni tiin phuba lak ngei a intiam a ni.
A hnu lawkah Israel chuan Hezbollah commander Fuad Shukr chu Beirut khawpuiah a tihlum a, a chetlaknaah hian midang pali an zinga naupang pahnihte chu thi zingah an tel a ni.
Chumi hnu lawk chuan Hamas chief Ismail Haniyeh chu Iran-ah tihhlum a ni leh a, Haniyeh chu Iran new president Masoud Pezeshkian lakluha tel tura Tehran lut a ni.
Kar kalta Ningani a Tehran-a Haniyeh vuina inkhawm neihah Iran Supreme Leader, Ayatollah Ali Khamenei chuan tawngtai a kaihhruainaah Israel chuan hremna na tak a tawk ang tiin a sawi a ni.