Middle East boruakah beng chhi turin India-in Israel-a a mite chah

Middle East boruakah beng chhi turin India-in Israel-a a mite chah
Indian sorkar chuan Israel-a a mi awmte tan thurawn tichhuakin thil thlengte ngaihvena beng chhi reng turin a ti a, himna tura inkaihhruaina dan siamte zawm turin a chah.
Middle East-a boruak inlumlet mek avangin Indian khua leh tuite chu tul bik thil lovah chuan Israel-a zin rih lo turin a chah bawk.
“Heng lai vela thil awm dan thlir hian Israel-a Indian awm mekte chu bengchhi reng leh Israeli thuneitute leh Home Front Command-in himna atana ruahmanna an siamte zawm zel tum tur a ni,” tiin external affairs ministry-in thurawn a tihchhuahah hian tar lan a ni.
“Indian-te chu tul bik thil lovah chuan Israel-ah zin rih loh tur a ni a. Rikrum thil a awm chuan Embassy of India-a 24×7 helpline biakpawh nghal vat tur a ni,” tiin biakpawhna tur telephone number pahnih a tar chhuak bawk.
Indian sorkar hian Iran-a mipuiten an ram puma lungawi lohna lian tak an lantir mek lai leh US-in sipai chakna nena inrawlh mai a hreh lo tih a sawi mek laiin thurawn hi a tichhuak.
Iran pawhin US-in a bei a nih vaih chuah an chhehvela US sipai hmunte chu an tum hmasak tur a nih thuin a chhang a. Hetiang karah hian Tehran hmelma lian ber pakhat, Tel Aviv pawh a ralmuang chuang lo a ni.
Israel-ah hian an ram chhim leh lailia vantlang tana siam indona a chhuaha tawmna tur, public shelter-te pawh an hawng niin tual chhung chanchinbute chuan an tar lang ve bawk.
Turkey-a Anadolu agency chuan Israel chhim lama Dimona mayor chuan ‘inbarakhaih thut ai chuan inbuatsaih lawk a tha’ a tih avangin an khawpuia shelter zawng zawng hawng vek turin thu a pe niin a tar lang.
Indian sorkar hian boruak chhe tak awm mek avang hian Iran-a a khua leh tui awmte hruai haw turin a inbuatsaih mek bawk a, thurawn a tichhuak tawh bawk.
Nilaini khan Tehran-a Indian embassy chuan lungawi lohna lantirna a nasat zel karah Indian-te tan thurawn thar a tichhuak a. Iran-a awm mek Indian – zirlai, biakzin, sumdawng leh khualzin pangngai zawng zawngte chu Iran chhuahsan thuai turin a ti a. Hriattirna hi boruak tang tak awm mek thlira tichhuak a ni tih an tar lang bawk.
Embassy hian Iran-a Indian khua leh tui leh PIO awm mekte chu lungawi loh lantirnaa tel ve lo tur leh a hlata awm zel turin a ngen bawk a. Indian Embassy bepawh theia awm reng tur leh thil thleng tharte pawh tual chhung chanchinbua ngaihven reng turin an chah.
Iran-ah hian zirlai telin Indian 10,000 chuang hret awm tura chhut a ni.