Mihring seh hlumtu sakei thiin chhar

Mihring seh hlumtu sakei thiin chhar
Inrinnia mihring eitu sakei chu Thawhtanni khan Kerala tlangram district, Wayanad-ah thia hmuh a ni a. A ruang endiknaah chuan a pumpuiah a mi seh sam, thawmhnaw leh a bengbeh hmuh a ni tih forest thuneituten an sawi.
A mi seh hmeichhia hi coffee bean lo tura kal niin sakei hian a lawhna hmunah hian a bei a ni.
Sakei nu a ni a, kum li/nga vel a ni a, Thawhtanni zing hma takah khan wildlife-a thawktuten an hmu a, an chhui zui a, chawhnu herah Pilakavu huam chhunga mihring chen lohna in hnung lamah thii an hmu ta a ni.
A ruang endik nghal niin a nghawngah hliam thar lam thuk tak an hmu tih an sawi a. Ramhnuaia sakei dang nen an insualnaa a hliam niin an ring.
A pumpuia an thil hmuhte atangin Pacharakolli-a Radha-i seh hlumtu ngei kha a ni tih an finfiah thei a ni.
Radha-i thihna avang hian an chenna velah mipui an thinrim hle a, state sorkar pawhin Pathianni khan ‘mihring eitu’ tia puangin tihhlumna tur thupek a chhuah.
Chief Veterinary Surgeon Dr Arun Zachariah-a kaihhruai team thawk chhuakin chhun zan zawmin an zawng zui a. Thawhtanni tuk khan an hmu a, kah muthilh an tum laiin an hlawhchham hlauh niin an sawi.
Thihna a thlen hnuah khan Forest Minister A K Saseendran chu nasa taka sawisel niin Pathiannia Radha-i te chhungkua a tlawhnaah phei chuan an lo bawr nasa hle a. Sakei a thi ta tih an hriat pawh hian an lawm hle a ni.
Sakei thina thenawm district, Kozhikode-ah minister hian wildlife hotute fakin sakei man an tumnaah an nunna atan pawha hlauhawm khawpin an che tih a sawi.
Pancharakolli-a sakei hi tihhlum ni tawh mah se Wayanad district-ah hian sakei dang a awm nia hriat a nih avangin wildlife team chuan an bei zui zel tih a sawi bawk.
Sakeiin mi a tihhlum avang leh a zawn hna thawh dawn avangin Pathianni khan Mananthavady Municipality-ah curfew puan a ni hman a ni.