A lehkhabu ‘Never Give an Inch: Fighting for the America I Love,’ tihah Pompeo chuan Ghani leh Afghanistan chief executive hlui Abdullah Abdullah te chu eirukna nasa ber bera kalpui tia sawiin August 2021 a US a inhnuhdawhna lamah pawh harsatna a awm phah a ti bawk.
Augsut 31, 2022 khan US chu kum 20 chuang a awm hnuah Afghanistan atangin a inhnukdawk fel a. “Inremna siam tura hmalakna kalpui laia harsatna ber chu Ghani a ni. World leader thahnem tak ka tawng tawh a, Ghani hi ka ngainat loh ber a ni. Kim Jong-un, Xi Jinping, Vladimir Putin te pawh ka titipui vek tawh a ni a. Ghani chu mi lem/der a nia thuneihna a chan theihna chauh ngaihtuah mi a ni” tiin Pompeo chuan a ziak a ni.
-- Advertisement --
“A thuneihna derthawnga awm pawh pawi ti lova ram a hruai chhin eih ka hre lo,” tiin a ziak bawk.
Pompeo chuan Afghanistan inthlanah pawh Ghani an chakna a chan leh theihna chhan chu electoral fraud turu tak kalpui a nih vang a ni a ti a.
“Final result-ah chuan Ghani-an Abdullah Abdullah a hneh a. Thudik tak zawk chu Ghani chuan voter tam zawk a tham mai zawk a ni,” tiin US Secretary of State hlui chuan a sawi bawk.
Pompeo chuan Ghani leh Abdullah te chuan Afghanistan ah sorkar tha a awm ang em tih pawh ngaihtuah hauh lovin an inbei tawp mai a ni a ti bawk a.
“General Austin Scott Miller ngenna angin March 23, 2020 khan Afghanistan ka pan a, chutah chuan an insiamthat a ngaih thu ka hrilh a ni. A nih loh chuan President Trump hnenah USD 5-6 billion kum tin foreign assistance kan pekna hi kan chhuahsan a ngai ang tih ka hrilh ang ka ti a ni,” a ti a.
“US-in chhawmdawlna kan pek te chu civil order awm theihnan a ni a. School leh healthcare atan te a ni a, local leader te US sum hmanga an duhthala an chetna tur a ni lo,” ati bawk a.
“Ka thusawiin a deng na bawk a, USD 1 billion kan humhim thei a. May thlaah Abdullah chuan Ghani hnenah thuneihna hlanin Afghan sorkar head an neih theih phah ta hrim hrim,” a ti bawk.
“Ashraf Ghani leh chief executive Abdullah Abdullah te chuan cartel hmangin US tanpuina million dollar tel an la a, an eirukna turu lutuk chuan hlawhtling takin Afghanistan min chhuahsantir theih loh phah,” tiin Pompeo chuan a ziak bawk.
Ghani hi a hma pawhin Afghan mipui te sum dollar million tel Dubai ah inhumhimna zawnga tlansana chhep relha puh a lo ni tawh hrim hrim bawk.