Milan derby thununtu Inter
Italy rama derby lar ber Milan derby-ah Inrinni zan khan Inter Milan chuan 5-1 tehrengin AC Milan an sawp a, he derby hnuhnung vawingaah Interna-zionale an chak fai vek a, he derby history-a vawinga an chakzawn tumkhatna a ni.
Inter Milan hian Serie A season bul an tan fuh chhun-zawm zel a, kartawp San Siro inkhelah pawh goal thun kawng-ah harsatna an tawk lo a, minute ngana lekah Henrikh Mkhitaryan chuan home team goal hmahruai thunin, second half tir lamah a goal hnihna a thawh zui leh.
Minute 40 khelh tlin dawnah Marcus Thuram chuan Inter Milan goal hnihna tilut ve lehin, half time-ah mualneitu team hian sihnih faiin hma an hruai phawt.
Second half tir lam minute 57-ah Rafael Leao chuan AC Milan beiseina siamsakin an siphurh pakhat zawk sut then bawk mah se kha goal kha hun puma Milan goal neihchhun a ni zui ta a; chutih laiin Mkhitaryan, Hakan Calhanoglu leh Davide Frattesi-te’n Inter tan chawlhlawk hnu hian khungbelhin, league khelh lia point 12 hum chungin Inter hian Serie A hma an hruai a; point kua nei chungin Milan-in pathumna an luah thung.
Milan hian naktuk, Thawhlehni Champions League group stage match-ah Newcastle United an mikhual dawn a, Europe inkhel pawimawh an hmachhawn dawn laiin San Siro-ah an tlawm chiang hle a, derby-ah khan goal zawnah tum hnih chiah ball an thawnlut zo a, Inter ha hriam an dang zo ngang lo.
Inter Milan-in ball 40% chauh chang mah se nuamsain San Siro inkhel an thunun a, phu takin point thum an hlawhchhuak.
Thuram chu Inter tana khel tha langsar niin, first half-ah a goal bawh a na a, chance a siamchhuak mawlh mawlh a, veilam sirah lehlam player Theo Hernandez leh Malick Thiaw a chhaihbuai hle.
Inrinni inkhel dangah pahnihna luahtu Juventus chuan 3-1-in Lazio an hneh a, season thara an tlawm loh chhunzawm ve bawkin, point 10 an khawl tling tawh.
Milan derby thununtu Inter
Get real time updates directly on you device, subscribe now.
Prev Post
Next Post