Mimal hamthatna nge mipui ham\hatna kan dah pawimawh zawk dawn?

Dr.PL Ramliana

India ram hi kan hriat theuh angin Democracy ram a ni a. Chumi awmzia chu Lal bik nei lovin mipuiin kan aiawhtu tur kan thlang a. Chung mite chuan kan ram Dan ang zelin ro an rel thin a ni. India ram Democracy a nih dan hi mithiam ten an sawi danah chuan Union of States an ti a. State hrang hrang inzawm khawm kan ni a, sawrkar laipui Centre thuhnuaiah kan awm a. State te hian thuneihna tawp chin kan nei a ni. Federal Government an tih USA ang te khu chu kan ni lo a ni. Mizoram pawh India ram bung khat kan nih avangin India sawrkar laipui thuhnuaiah awmin eng emaw chen chu India Dan angin thuneihna pawh kan nei a ni.
India Danah hian State leh Centre thuneihna tur fel taka ramri kham a awm a. Chungte chu hlawm lian pui pui pathumah then niin Centre thuneihna bik tur te, State thuneihna bik tur te, State leh Centre thuneih intawmna tur te an ni a. Union List tih te, State List tih te, Concurrent List tih te in hming an vuah a ni. In leh lo neih leh chung atanga chhiah lak zawng zawng te chu State thuneihna bik tura duan a ni. Chutichuan in leh lo ram chungchang reng reng chu State thuneihna a ni ta a. A tak takah chuan ram te pawh hi a neitu dik tak chu State a ni kan ti thei ang. A mihring chengte erawh chu a luahtu kan nih avangin keimahni leh kan tu leh fate awm nan a neitu nihna sawrkar atangin kan nei thei chauh a ni. Chu vang chu a ni kan inhmun lo ramte pawh hi sawrkar atangin LSC te periodic patta leh permit dangte neih kher a ngaihna chhan chu.
Mizoramah hmasawnna hnathawh chi hrang hrang sawrkar laipui leh State sawrkar hmalaknain a kal thin a. A bik takin motor kawngpui laih hi a langsar zual zinga mi a ni awm e. Heng hnate hi mipui hmasawnna tur atana thawh a ni tih kan hre chiang theuhin a rinawm. Kan zavaia thlei bikna awm lova kan hman tangkai tur a ni a. Kawngpui a that leh hma kan sawn chak dawn a ni mai. Rel kawng lahin a la thleng tawi deuh a, kan la hmang tangkai lutuk si lo va. Hetiang hmasawnna hnathawh te hi mimal hamthatna avanga a khaihlak kan hre fo mai. Tun hnaia NHIDCL in kan Governor hnena report an pekah pawh a lo lang a nih kha. Mimal han tih hian pakhat chauh ni lo, pali panga. Sawm aia tam intelkhawm te pawh a ni thei. Chutiang mite chuan Mizoram mipui nuai 14 vel hmasawnna an dang bet reng thei a. Department pahnih khat pawhin an dang bet ve thei reng bawk. Mimal hmalakna avanga kawngpui chhiat kan tuar fo bawk. Hetiang a nih mek lai hian mipuite hi kan ngawi mai mai thin a, kan ti dik chiah em inenfiah ila a tha khawp mai. Chutih laiin sawrkar pawhin a chinfel hna huaisen leh dik taka a thawh thuai thuai a ngai a ni. ‘Kei chu mi tlemte hamthatna tur ngaihtuah ai chuan Dan ang zelin ro ka rel ang a, Mizoram pumpui aiawhtu ka ni a, mipui tana a that dan zawkin thutlukna ka siam ang’ ti tlat roreltu kan mamawh ta hle a ni.