Inthliarna avangin ram pasarih hrem an ni

Uefa chuan Euro 2024 khelh laia inthliarna lam hawi auchhuahpui (racist chant) avangin ram pasarih lakah hremna a tarchhuak.
Tuntum Germany ram tournament-ah khan fans atangin vunrawng leh chi inthliarna dang avanga inauhnawmnahna game 17-ah a thleng tih Uefa chuan a nemnghet a, an chhuichian hnuah ram pasarih – Serbia, Croatia, Romania, Slovenia, Austria, Hungaria leh Albania football association theuhte lakah hremna a tichhuak.
Croatia federation bik chu euro 50,000 (£41,970) atanga intan sum chawi bakah Uefa away match an khelh leh hmasakber tur kumin September ni 5 Portugal ram Nations League game-a ticket hralhchhuah loh a tel!
Austria laka hremna pawh a nep lo hle a, euro 20,000 euros (£16,790) thleng chawi thei tur leh Uefa away match an khelh leh tura ticket hralh phal loh tihte bawk a ni a, mahse, hremnate hi lekkawh nghal tur a ni lo a, kum hnih chhung an enthla phawt ang a, hetih chhunga an supporter-te’n a ngai bawka inthliarna lam an aupui leh chauhin kenkawh tur a ni a, he tih chhunga an fans nungchang a that chuan hremna hi an tuar kher a ngai lo thung ang.
Champion lawmnaa politic lamhawi an tihlan avangin Uefa chuan Spain player pahnih Rodri leh Alvaro Morata-te pawh thubuai a awrhtir a; final-a England an hneh tum khan an ram thenawm leh Spain awp ram ni thin, mahnia ro inrel ta Gibraltar chu Spain ram a la nih rengzia hlaa an sak vang a ni!