Minister hoin Zawlbuk Titi

Minister hoin Zawlbuk Titi
Minister B Lalchhanzova chuan Khawbung Zawlbuk tualah mipui nawlpuiin sawrkara an duh thlenna hun leh zawhfiah ngaite zalen taka zawh theihna hun – ‘Zawlbuk Titi’ Thawhlehni khan a buatsaih.
Minister chuan mipuiin Assembly House-ah thusawina hun leh hmun chang lo mah se, mipui aiawha thlanten mipui duh dan leh thurawn fing tak tak an lak fo chuan mipui duhdanin ram rorelna a kal mai thin a, chutianga mipui sawrkar a awm theihnan ‘Zawlbuk titi’ hi buatsaih a ni tih a sawi.
“Mipui hian sawi duh leh veizawng tam tak kan nei a, ram hruaituten mipui aw kan ngaithlak fo a tul. Mahni vei zawng sawina hun remchang nei lo, a bikin thingtlanga chengte hi kalchilha inpawhtlang taka inkawmho fo hi thil tul tak niin ka hria,” a ti.
Zawlbuk Titi hi Community Outreach Programme anga buatsaih niin, ration card chi hrang ramri kham dan leh buhfai man to chungchanga an hriatfiah loh leh thurawn an neih angte sawi a ni a. Revenue minister ni bawk B Lalchhanzova hmalaknaa computer hmanga mimal, vantlang leh sawrkar ram chhinchhiah fel turah mimal ram periodic patta awm lo leh house pass tam tak chinfel loh chu chak zawka chinfel nise an duh tih an lo thlen a. Revenue minister hian ruahmanna an siam tawh dan a hrilhfiah a ni.
Minister hian Khawzawla FCI kudam sak tur ruahmanna a enpui a; Champhai district-a buhfai kudam hrang hrang tlawhin, hunpui atan buhfai chhekkhawl a tam tawk thu thawktuten an lo hrilh a ni.