Minister-in centre a dawr

Minister-in centre a dawr
Minister Lalnghinglova Hmar chuan a department chan mamawh thlenin Thawhtanni khan sawrkar laipui hotute a dawr.
Union Youth Affairs & Sports Dr Mansukh Mandaviya a hmuhnaah Mizoram Sports & Youth Services minister chuan, India-in Olympic Games 2036 thlen a tumnaah Mizoram atanga infiammite an tel ve ngei a duh a. Hemi inbuatsaihna atan hian Mizoram Sports Conclave pawh kumin June 13-14 khan buatsaih a ni a. Sawrkar flagship scheme ‘Bana Kaih’ hnuaiah Mizorama sports coaching liantham bultanna tur ruahman a ni tih a sawi.
Mizoram chu state lian lo tak a ni a, sports budget pawh duh angin a tam thei lo, tiin, sports-a Mizoram hmachhawp hlawhtlinna atan sawrkar laipui puihna a mamawh tih a sawi a. Sawrkar thachakna belhchhah turin corporate leh public sector undertaking (PSU) hrang hrang pawh dawr kual mek a ni tih a sawi a ni.
Union Sports minister chuan Mizoram Sports minister hmathlir leh Mizoram sawrkarin hma a lo lak tawhna chu fakawm a tih thu a sawi a. Sum dil tur ringawt ni lo, vision mumal tak nei chunga mamawh a thlen thin chu lawmawm a tih thu a lo hrilh. Sports infrastructure leh thildang a tulna apiangah a puih tur thu a lo hrilh a ni.
Union minister Dr Mansukh Mandaviya hian state hrang hrang Sports minister leh PSU-te inhmuhkhawm pui a tum hnai tih a sawi a. State-a sports department leh PSU-te awmze nei zawka thawhho dan tur, ‘one State-one PSU model’ buaipui mek a ni tih a sawi.
LESDE minister Lalnghinglova Hmar hian Ministry of Labour & Employment secretary Sumita Dawra pawh kawmin Mizoram mamawh hrang hrang an sawidun a ni.