Minister-in mipui dah hmasa turin chah

Sawrkar chu mipui ta a nih angin, sawrkar hnathawk chu mipui rawngbawltu an ni a, an hnathawhnaah an rawngbawlsak mipui dah pawimawh hmasak nachang hre zel turin minister Dr Vanlalthlana chuan a chah.
Information & Public Relations, Information & Communication Technology, Higher & Technical Education leh School Education changtu minister Dr Vanlalthlana hian Thawhlehni khan heng department hotute nen kum 2025 atana inhlan tharna leh infuih tharna hun a hmanpui a. Kum kaltaa department official-te nen thawhhona tha tak an neih avangin lawmthu a sawi a. Kum thar a nih angin rilru thar pu chunga ram leh hnam tana theihtawpa thawk chhunzawm zel turin a department enkawla thawktute a fuih.
Sawrkar chu thawhhona leh inrintawnna avanga kal thei a ni tih sawiin, inpawh tak leh inlungrual taka thawk theuh turin a chah a. Sawrkar chu mipui ta a nih angin, sawrkar hnathawk chu mipui rawngbawltu an ni a, an hnathawhnaah an rawngbawlsak mipui dah pawimawh hmasak nachang hre zel turin a chah bawk.
Kum thar inhlanna leh infuihtharnaah hian Dr Vanlalthlana enkawl department hrang hrang aiawha telte nen an inkawm a ni.