Minister in nhlan tharna hun hmanpui
Land Revenue & Settlement Department inhlan tharna hun hmanpuitu Minsiter B. Lalchhanzova chuan Pathian leh mipui zara sawrkarna an chang ta chu nawm chenna tur niloin mawhphurna lian tak lungngaih pui tham anih zawk hial thu a sawi.
New Delhi ah training a a kal chhungin Dept of Land Resources a dawr chungchanga Delhi lama hotute an inhawn zia a hmuh in lawmawm a tih thu a sawi a. Land Revenue & Settlement Dept. chu department pawimawh milian leh te, sawrkar leh pawl zawng zawng mamawh khawih department annih angin thawktute chu nitina an hnathawhna ah rinawmna leh taihmakna vawng nung reng turin a chah a. ZPM sawrkar chuan langtlang tak leh khairual taka hna a kalpui tur thu sawiin, department a thawk mi tha tamtak kara mi rinawm lo leh pamham lo awm ve thin ten department hmai an ti bal thin chu pawi a tih thu a sawi bawkan tun hnu ah awm tawhlo se a duh thu a sawi bawk.
Thawktute chu department hmasawnna kawng leh mipui rawng tha zawka an bawl theih nana theihtawp chhuah puiah sawmin hemi kawngah a puihna an mawmawhna apiangah a in hawn reng thu a sawi a. Thawktute biak phak loh emaw an hlauh tur nilovin thil tha an tihpui tur Minister nih a tum thu a sawi a. Department chu office mai nilovin institution, thil tha zir leh tihna hmun anih thu sawiin, office chu thil tha tia hlimna hmun tur anih thu leh working environment tha leh nuam siam turin thawktute chu a chah bawk.
Assam Rifle ram chhuahsan tura mimal ram nei surrender tawh te chu an fakawm tiin lawmthu sawina lehkha ziak pek vek a tum thu a sawi a. An ram la surrender lo te pawh a mal mala kawm a solution zawn pui a duh thu sawiin, House Pass dilna Minister kaltlang kher a lak a ngai thin chu mipui tan harsatna a thlen tam zawk ni a a hriat avangin, a tih tawp thu leh Director kuta a hlan thu a sawi.
Minister chuan Surveyor indaihlohna phuhru turin survey hna outsource na tur peihfel a nih tawh thu leh EOI tih chhuah mai theih a ni tawh tih a sawi a. Property registration leh thil tul danga hman turin E-stamping rules duan mek a nih thu sawiin, hei hian mipui tan awlsamna a thlen bakah stamping atanga sawrkar sum lak luh a pui hle dawn tih a sawi bawk.