Minister-in Sikkim tlawhtute kawm

Minister-in Sikkim tlawhtute kawm
Sikkim Press Tour-a kal Mizoram Journalists’ Association member-te chu Information & Public Relations minister Dr Vanlalthlana’n Thawhtanni khan a office-ah a kawm.
Press tour hlawhtling tak nei a, dam taka Mizoram an lo let leh chu lawmawm a tih thu I&PR minister hian a sawi a. Mizoram pawhin ‘tourist’ tam zawk hip turin hmunhma leh tlawh tur tha tak tak a nei tih sawiin, inzawrh (marketing) lamah tan lak a tul tih a sawi.
Mahni inpho lâr a, tourist hip thei turin MJA member-te chu an thuziak kawngah theihtawpa auchhuak turin a sawm a. Mizoram hmun mawi leh tlawh tlak ang angte cheithat kawngah tun aia tan lak a tul, tiin, mipui pawh tourist dawng thiam turin hawihhawm kawngah nasa zawka ngaihtuahna sen thiam a tul tih a sawi a ni.
“Press tour neih a lo ni fo tawh thin a, rualawhna nen kan let thin. Rilrua ngaihtuahna kan neih leh Mizoramah pawh tih ve theih nia kan hriatte tihhlawhtlinna atan department hrang hrang beng thleng phak tura hma lak thiam a tul hle,” Dr Vanlalthlana hian a ti a. Press tour hlawhtling taka neih a nih zel theihnan rawtna felfai tak siam a, tour neih leh dawna enlet theiha ruahmanna siam thin turin official-te a chah bawk.
Press tour-a kalten report an pe a. An rualawhna leh Mizorama tih ve atana tha leh ram tana tangkai tura an hriat chu minister hnenah hian an thlen a ni. A tul anga hma lak a nih theihnan MJA-te chu a kaihhnawih department-te sawipui turin a chah a ni.