Minister Dr R. Lalthangliana chuan a department chan hnuaia hmalakna leh hmachhawp thil pawimawh hrang hrang bawhzuiin Zirtawpni khan sawrkar laipui a dawr.
-- Advertisement --
Commerce & Industries minister hian Ministry of Micro, Small & Medium Enterprises (MSMEs) secretary BB Swain hmuin Mizorama industry tihchangtlunna tur project hrang hrang – Luangmual (Aizawl), Lunglei, Champhai, Kolasib leh hmun danga factory complex dinna tura department-in project a thehluhte an lo pawmsak avangin lawmthu a sawi a. BB Swain hian MSME hnuaia tourism cluster project hrang hrang siama thehlut turin thu a lo rawn a, an lo bawhzui tur thu a hrilh.
Health ministry special secretary Gopalkrishnan leh official dangte Health minister hian kawmin, Union Health minister-in ZMC Academic Block a hawn tur a sawipui a. RIPANS-a infrastructure lam hna thawh mek (100-bedded hospital, administrative building, Boys’ & Girls’ Hostel leh auditorium) a muan deuh avangin lo enpui a, ministry lamin an consultant-te vil a, an hna lo tichaka sa zo thuai turin a thlen. Kum 2019-a ministry-a a lo nawr tawh post graduate course thar 7 hawnna tur chu Mizoram bakah northeast pumin a chhawr tur a nih avangin hna lak leh tul dangte tirang turin a hrilh. Mizoramin para medical institution a neih chu state dangin an neih zen zen loh a nih avanga a ngaihpawimawh thu thlenin, ministry official-te hian an lo bawhzui tur thu an lo hrilh.
NITI Aayog member (Health) Dr VK Paul chu Mizoram mamawh te a sawipui a. A ni hian Mizoram tana MRI khawl leina tur leh PHC thenkhata x-ray khawl leina tur an bawhzui mek thu a lo hrilh. Nikum lama Mizoram lo zina meeting neih a tum a thulh leh tak avangin kumin February hian meeting neih theih a beisei thu a lo hrilh bawk.
Ministry of Education-a economic advisor Mrutyunjay Behera leh MZU Southern Campus changtu joint secretary-te Higher & Technical Education minister hian a hmu bawk a. An ni hian a building sak leh infrastructure din chungchangah Mizoram University-in rawtna siam se, an lo ngaihtuah tur thu in an lo chhang a ni. RUSA 3.0 chu an muangchang a tih thu a thlen a, cabinet approval tura a file a kal mek thu leh kum thar atanga chuan RUSA sum chu a hman awlsam (flexible) zawka ruahman a nih thu a lo hrilh.