Khawtlang hmunhma leh thil neih hlut thiam apiang chu khawtlang nuam leh changkang a ni tih minister K Lalrinliana chuan a sawi.
-- Advertisement --
Rural Development department leh MLA-LADS hmanga sak Project Veng Futsal Ground leh MLA Cup 2023 Kolasib District Open Futsal Tournament, Inrinnia a hawnnaah Kolasib bialtu MLA ni bawk K Lalrinliana chuan hmasawnna hna chak zawka kalpui tur chuan ruahmanna fel siam hmasak a tul avangin Kolasib Town Master Plan pawh duan thin a ni tih a sawi a. Kolasib Project vengah FastTrack Court, judicial quarters sak kalpui mek a nih bakah basketball court leh sawrkar hmun pawimawh sakna turin ruahmanna a awm tih a sawi. “Khawtlang hmunhma leh thil neih hrang hrang hlut thiam apiang chu khawtlang nuam leh changkang an ni thin,” a ti.
Futsal ground siam thar chu Kolasib thalaite tan infiamna kawnga hmasawnna leh hriselna thlentu hmanraw tangkai a nih a duh tih sawiin, changtlung zawka chei chhunzawm a nih theih nan ruahmanna siam a nih tur thu a sawi.
Kolasib bawrhsap John LT Sanga chuan Mizoram chu tlangram a nih angin veng hrang hrangah ram leilungin a zir loh avangin football field puitling siam a rem thin lo a. Heng harsatna hi futsal infiamna intihhmuhna hian hmun tam takah thalaite tan infiamna hmun a hawnsak mek tih a sawi.
Project Veng Futsal ground hi MLA-LADS atanga cheng nuai 12 leh DRDO hmalakna atanga sak niin, YMA hnatlang tum 20 vel neih a ni.