Minister-in thupha chawi loh chuan thubuai thehluh tum

Minister-in thupha chawi loh
chuan thubuai thehluh tum
Local council leh village council inthlan campaign laia minister pakhat thusawuh duh dan chu mipui vauna leh rikrapna lam a ni tih AAP chuan sawiin, mipui hmaah thupha a chawi lo a nih chuan dan a bawhchhiatnaa hrem a nih theihnan an bawhzui dawn tih an sawi.
AAP Mizoram thuchhuak chuan, local council leh village council inthlana tlingte a lawmpui a, an veng/ khua tan theihtawp an chhuah theihnan duhsakna a hlan tih sawiin, eng party pawh nise mipui sawrkar chuan tha taka a thawhpui ngei a beisei tlat tih a sawi a ni.
Hetihlai hian inthlan hmaa campaign dan hrang hrang an thlirin, mipui sawrkar din tumna a awm lo nia a hriat thu sawiin, ‘A bikin minister pakhatin campaign-a a sawi, oppostion LC/VC tan minister biak emaw auh ei an har tur thua mipui a vauna nia lang kha tha lo kan ti hle a, mipui chavo rahbehna, invauna leh inrikrapna niin kan ngai. Hei hian The Representation of the People Act 1951 leh model code of conduct chiang takin a kalh a. Chuvangin Agriculture minister hian Mizoram mipui hnenah thupha chawi ngei se tih kan phut a, thupha a chawi lo a nih chuan mipui thlavang hauhna atan leh dan bawhchhia a nihna ah hrem ngei a nih theihnan a tul dan angin thubuai kan thehlut ang,’ a ti.
ZPM thlantlin an nih chhan chu mipui sawrkar an tiam avangte, party bil duhsak bikna a awm dawn loh avang leh an intiamna hrang hrang vang a ni tih AAP chuan a sawi a. Hei vang hian an sawrkar pawh a hmaa party kal tawhten an tih thin dana ti ve lo tur leh an lo tipalh a nih pawha insiamtha thuai turin an ngen tih a sawi a ni.