Minister leh I&PR hotute inkawm

Information & Public Relations (I&PR) minister Dr Vanlalthlana chuan Thawhtanni khan a pisa-ah I&PR department hotute kawmin hmalakna leh hmachhawp a sawipui.
Minister chuan department hotute chu hmasawnna tura tul inhrilhhriat leh infinchhuah kawngah inthlahrung loa thurawn pe zel turin a fuih a. Thawhhona tha tak neih a beisei tih sawiin, I&PR department chu mipui tana hriat tur tul sawrkar thuchhuah puangzartu leh zirtirna petu a nih avangin thawktute chu inthlahdah loa ram leh mipui rawngbawl kawnga thahnemngai taka thawk turin a chah.Department hotute chu sawrkar duhdan angin office inkaihhruaina dan tha taka zawm a nih theih nan hma la turin a chah a. Chhan leh finfiahna tha tak awm loa aikal lak bakah lirthei kawl theih chin bak kawl chungchang ngaipawimawh turin a chah bawk. Office cheibawl leh thawmthat a tul hunah tualchhung thilsiam leh Mizo kutchhuak ngei hmang hram tura chahin, department hotute atanga mamawh leh tul thlen chu a remchan anga bawhzui zel tum a ni tih a sawi.
Thutkhawmah hian khawvel changkang leh hmasawn zelah media hrang hrang kaltlanga hmalakna rang taka hmuh leh hriat theiha a awm tawh thu sawi niin, nodal department nihna anga hmalak tulte pawh ngaihtuahho a ni a. Thlalak hlu tak tak, nakin zel atana awlsam zawka enlet leh theih tura tha taka vawnhim a nih theih nan documentation leh archive tihchangtlun dan tur pawh sawi a ni. District leh directorate hnuaia infrastructure neih dan, thawktu neih dan leh pawimawh dangte sawi ho a ni.
I&PR secretary HM Hualsangi, director C Lalnunkima leh senior officer-te atangin separtment kaltlanga hmalakna tlangpui leh hmachhawp sawi a ni bawk.