Minister pahnihin bial sawn rilruk

Inthlanpui a hnai a, politics ngaihvente chuan ding tur leh ding lo tur an ring thiam thui viau tawh. Thil a la danglam thei viau na a, a hlimthla hi a lang ruak tawhah ngaih a ni.
Minister ni laite pawh ding leh tura ngaih an ni hlawm a, pahnih chuan bial sawn an tum niin a lang.
Sports ministe Robert Romawia Royte chu Aizawl East II atangin Hachhek biala insawn tura ngaih a ni a, hei hi thil a inlet viau a nih loh chuan a chiangah ngaih a ni. Power minister R Lalzirliana’n |awi bial atangin Aizawl East II-a luh a tumah ngaih a ni ve bawk. Minister ni laite zingah anni pahnih hi bial sawn tuma ngaih mek an ni.
Minister RRR-a hi Kum tir lam atang khan Hachhek biala insawn tumna a nei em ni tih turin a awm a, March thla tawp lama rialin khawthlang lam khaw thenkhat a tihbuai laia Hachhek bial-a a chet danah khan Hachhek biala din a tumah ngaih ngheh a ni.
A hnu zelah pawh Hachhek bial hi a hnim hnai a, MNF-ah pawh he bialah hian mi a lawmlut thin. Hachhek biala Kawrthah Area MUP te tan tun karah Aizawl leh a chhehvel fanna a siam bawk.
A bial chhuahsanah hian minister R Lalzirliana a ding dawn nia sawi a ni a, ani hi a hma chuan Aizawl North I-a din tum anga ngaih thin a ni.
R Lalzirliana hi Aizawl East II mi a ni a, he bial mi bawk B Lalawmpuii, AMC ward IX bialtu, hmingtha tak chu he biala MLA-a ding tura ngaih a ni ve mek tho bawk.
Zirtawpni khan MNF party nomination committee an thu a, an vawi khat thutkhawmnaah hian thil lian tham chu an rel nghal lo turah ngaih a ni. Sorkarna chang mektu party hian bial awl 12 an nei a, candidate tur thlan chungchang pawh an tan rel fel a awl tura ngaih a nih rualin, an tihsual chuan harsatna tawk thei an ni ang tih chu ngaihdan awm mek a ni.
Minister pahnih bial sawn tum chungchangah pawh hian party chhungah pawm lo an awm nghal a, party thu pawh ni lova lo insiam rem ve ngawt hi a dik lo tih ngaihdan nei an awm tih thu dawn a ni.
Tun term-a thi beh mekte zingah Lalrinliana Sailo, speaker chungchang hi MNF lama ngaihven hlawh pakhat ni turah ngaih a ni a, ani hi MNF ticket-in a ding leh ang em tih zawhna a awm mek.