Minister-ten department hmunhma tlawh

Rural Development minister Prof. Lalnilawma chuan Thawhtanni khan DRDO office Lunglei a tlawh a. Project director ST Lalvensangi leh a thawhpuiten lo dawng sawngin, RD department hnuaia thawktute nen an thukhawm.
Minister chuan RD department chu thingtlangmite tana thawk an nih angin, theihtawp chhuah zel turin a chah a. Mizorama MGNREGS kalphung chu thlak danglam hret a tul thu leh chu chu chonaa an ngaih theuh a tul thu a sawi. Tuihna humhalh pawimawhna leh hemi atan hian ‘Project Tuihna – Dam khawchhuahna’ ruahman niin, Lunglei atanga khuhhawn tur a ni tih a sawi bawk.
PHE minister Prof. Lalnilawma hian PHED superintending engineer office tlawh lehin, SE Lunglei Watsan Circle Zohmingliana leh a thawhpuiten an lo dawngsawng a, an inkawm ho a ni. PHE Lungleiin hma an lak tawhna leh hmachhawp an lo hrilhfiah a, an harsatna leh mamawh an lo thlen bawk.
Horticulture minister ni bawk hian District Horticulture Officer office pawh a tlawh a ni.
AH & Vety minister C Lalsawivunga pawhin AH&Vety ram Pukpui Lunglei ami, DVO office Chanmari Veng Lunglei leh Integrated Animal Husbandry & Veterinary Training Institute Lungpui zawl ami a tlawh a. Hmalakna leh hmachhawp bakah harsatna an neihte an lo thlen a ni. LAD minister ni bawk hian District Park Zobawk leh Laldenga Park Pukpui pawh a tlawh bawk.