Mipa international career nei rei ber chawl ve ta…
Mipa international career nei rei ber chawl ve ta…
Mipa international football-a hun hmang rei ber Ildefons Lima chuan kum 26 chhung teh meuh a lo kuah tawh a international career a zial ve ta nge nge a, Thawhlehnia Switzerland laka sithum faia Andorra tlawmna match kha ram tana a inkhelh tawpna a ni ve ta.
Kum 43 leh ni 276-a upa ni chunga Switzerland hmachhawn Lima hi European Championship qualifier khel thei upaber niin, kum 26 chhung khan ram tan match 137 a khel tling.
Kum 1997 daih tawha 1-4-a Estonia an hneh loh tum khan Ildefons Lima hian rawlthar kum 17 mi lek niin Andorra tan bul a tan a, official fixture-a Andorra goal hnihna a thun nghe nghe.
Khami hnu khan ram tan kum 30 dawn a inlan ta a, tunkar tir lama Switzerland an hneh loh tum khan minute 23-ah lakchhuah niin, khelmual a chhuahsan laiin Swiss leh Andorran supporter-te’n mihrang kalbo tur hi ‘standing ovation’ nen an thlahliam.
Switzerland game-a amah thlaktu Ricard Fernandez Betriu kha Lima international debut nghahchhuah hnu kum hnih dawn liam hnua piang ve chauh a ni!
Uefa chuan tunhmaa Twitter ni thin X tia thlak tak kaltlangin Andorra captain kumhlun chawl ta thlahna an tarchhuak a, national team career vawng rei ber a nihna tarlang chungin awihawm loh khawpa zinkawng thui zawhtu chu an lawmpui tih an tarlang.
Kum 2021 daih tawh khan Guinness World Records chuan Lima hi interna-tional playing career chhawmnung reiberah an lo puang tawh a ni.
Ram tana goal 11 thun tling Lima hi Andorra tana goal khung hnember ni bawkin, kum 2020 khan player-te tana Covid-19 test zing zawk a phut avangin national squad atangin Andorran Football Federation chuan an paihchhuak a, a kumlehah manager Koldo Alvarez leh Fifpro nawrna avangin a kirleh.
Club level-ah chuan Spain lamah a hun tam ber hmangin Espanyol, Las Palmas leh Rayo Vallecano thuam a inbel thin a, tunah hian FC Andorra B tan khel mekin, he team hi Spain defender hlui Gerard Pique ta a ni nghe nghe.
Hmeichhe lama ram tana khel reiber chu kum 45 mi Brazil midfielder hlui Formiga kha niin, kum 1995-2021 inkar khan kum 26 chhungin South American team tan game 234 a khel tling.