Mipa naupang kum 2 miin record siam

Mipa naupang kum hnih mi, Jude Owens chuan snooker trick shot-ah Guinness World Record chi hnih a siam tlat mai. He Manchester mipa naupang hian kum hnih leh ni 302 a upa a nihin, nikum October thla khan pool bank shot hlawhtling takin a ti thei a, chumi hma lawk, kum hnih leh ni 261 a upa a nihin snooker double pot hlawhtling takin a ti tawh bawk a, Guinness World Record chuan heng thil chi hnih tihlawhtling thei naupang berah an puang ta a ni.
Hetianga snooker khelh hi thil awlsam lo tak mai a ni a, mi tam zawk hi chuan ball pakhat a nih dan tur ang taka a kuaa luh tir tur pawhin an beih ngial a ngai ngei ang.
Jude hi snooker double pot ti thei naupang ber a ni a, pool bank shot ti thei naupang ber a ni bawk. Hetia Guinness World Records chi hnih a siam takah chuan Guinness World Record pakhat aia tam siam thei naupang ber a ni nghal bawk.
Jude-a pa, Luke Owens chuan a fapa chuan snooker lamah pianpui thiamna danglam tak a nei niin a sawi a, mipa naupang kum hnih mi chauh la ni mah se a game nuam tih ber chu snooker a ni tawh. “A han khawih vel hrim hrim danah pawh hian a zei nghal thlarh mai a, a pianpui a ni,” a ti.
Jude hi pool dawhkanah pawh a dak chhuak pha lo a, chair dawh kan sakin, a khel ve thei ngawr ngawr a ni a. A pa chuan, “Jude hian reilote chhungin a thiam tam hman hle a, mahse, world record pakhat mai pawh ni lo, pahnih lai a siam mai hi chu a danglam ve a ni. Engtin nge hetiang hi a nih theih zawk le?” a ti.
Luke Owen chuan, “Mipa naupang kum 10 mi vel ka nih atangin pool ka khel tan a, Jude hi chuan kum hnih a tlin atangin a khel tan a, kei aiin pianpui thiamna a nei tha daih zawk ka hmu nghal,” a ti bawk.
Snooker bank shot hi chu ball hawlh lirh a, a bang a den hnu a a sawt let leh chu a kuaa lum lut tihna a ni a, double pot hi chu vawi khat ball hawlh lirh a ball pahnih khak luh tir tihna a ni.