Mipa tan hockey zirna tha dil

Sports & Youth Services minister Lalnghinglova Hmar chuan Thawhlehni khan New Delhi-ah Ministry of Youth Affairs & Sports secretary Hari Ranjan Rao a kawm a, Mizorama sports hmasawnna tur, a bikin hockey chungchanga hmalak dan tur an sawi.
Minister chuan, Mizote game thiam chi ni si, tunhnaia kan khelh tam tawh loh hockey chu India tana international medal lak theihna kawng hnai a ni a, Thenzawla hmeichhe hockey zirna chu state-in a thatpui em em a, hetiang model hian mipa tana hockey zirna siam an duh tih a thlen.
Empowering Mizoram Sports hnuaia discipline pali – hockey, badminton, archery leh wrestling-ah SAI Training Centre din belh theih dan ngaihtuah nise, tiin a rawt bawk a. Director General of SAI ni bawk Hari Ranjan Rao chuan hockey tihhmasawn kawngah theihtawp chhuah a nih tur thu leh, infrastructure awm sa hmang tangkaia a zirna changtlung zawk siam theih dan an lo zir chian tur thu a sawi. India sawrkar pawhin hockey a ngaipawimawh tih a sawi bawk.
Ministry of Sports secretary chuan, Mizoram-in sports hmasawnna tur hmathlir fel tak a neih anga an kal chuan, India sports hmasawn zelnaah dinhmun pawimawh a luah theih thei a ring tih sawiin, India huap inelnaa chet that chhoh zel erawh a tul tih a sawi a ni.
Tunhnaia badminton lama Mizoram hmasawnna a lo hriat thu leh lawmawm a tih thu pawh a sawi a. Football-a Mizote hlawhtlinna chu sports dangah pawh thil tih theih a ni, tiin, Khelo India accredited training center ni tura Mizorama sports zirna kalpuina hrang hrang herrem tha a tih thu a sawi bawk.