Mipui hman chi lirtheiah chhui theihna dah dawn
Mipui vantlang hman chi lirthei (public transport) ah an thlen chin chhuizui theihna (tracking device) dah a ni dawn tih Transport minister TJ Lalnuntluanga chuan a sawi. Minister sawi danin, Ministry of Road Transport & Highways thuchhuak angin Mizoram sawrkar pawhin ‘Nirbhaya Framework’ hnuaiah passenger phur chi lirtheiah, awm nem zawk hmeichhia leh naupangte zahawmna tih bawrhban emaw hleilenna lam emaw thleng thin venna pakhat atan lirthei thlen chin hriat zel theihna tur khawl hi vuaktir vek tum a ni tih a sawi a. He project kalpuina atana ministry-in cheng vaibelchhe 10.4 a ruahman chu central leh state-in 90:10 a intum sem tur a ni tih sawiin, kum 2023 chhunga zawhfel tum a ni tih a sawi bawk.
He project kalpui tuma an inbuatsaih meknaah Mizoramah ngei pawh passenger phur lirthei hoah, a bikin hmeichhiate chunga hetiang lam thil thleng a awm tawh thu hi sawi a ni tih TJ Lalnuntluanga hian a sawi a. Hei hi thil pawimawh tak a ni tih a sawi.
An sawrkar hlima a thu aupui pakhat, Zohnahthlakte chenna hmun state dang leh ramdang nena inkalpawhna tha zawk siama, passenger bus tlantir an tumnaah, Manipur Churachandpur leh Aizawl inkara bus service tir tumin amah ngeiin Manipur chief minister Bireng Singh pawh dawrin, hma an lak laiin, khatihlai daih tawh khan tuna an state buaina, Manipur Zohnahthlakte leh Mizoram lam inpawhna tha awm theihna tur hi an lo hlauthawng tawh nge, tawngkam tha taka thlah chung siin, tihhlawhtlin tum zawngin Manipur sawrkarin hma a la zui lo reng reng tih Transport minister hian a sawi a ni.
Transport department-in inland water transport a lak tel avangin, tui lama inkalpawhna tur hi, a bikin Mizoram chhim lam tan ruahmanna hrang hrang nei mah se, sawrkar laipuiin tih mai tur anga an sawi chu hma an la chak lo hle tih a sawi a. Tunah hian Chhimtuipui leh Khawthlangtuipuia tuikawng siam tur hian hma lak a, bawhzui chhoh mek a ni tih a sawi.
An department chu sum hloh zawnga kal thin ni reng mah se, tunhnaiah an hloh lo ve tan ta tih Transport minister hian a sawi. Sum an hlohna pakhat nia lang, MST Wing atanga hlawh la thin, Motor Vehicle/ State Transport Authority Wing lam mi ni si te chu mi 102 te hlawh lakna siamrem a nih hnu ah, an sum hlohna nia sawi thin chu a tlahniam chho ta hle tih a sawi bawk.
Transport department chanchin minister sawi thenkhat:
# An department-ah post luah theih 684 a awm mek a, chung zinga 303 chu a ruak a ni.
# 2022 December 31 thleng khan Mizoramah driving license 484226 a awm a, lirthei registered 293448 a awm.
# Tunhnai kum 4 chhunga state sawrkar sumbawma sum chhunluh chu: 2018-19 ah nuai 3703.3, 2019-20 ah nuai 4951.6, 2020-21 ah nuai 3420.7, 2021-22 ah nuai 3385.4, 2022-23 ah nuai 4903, kum kal mek July thlengin nuai 866.
# Silchar-a Mizoram Transport department-in Pu Zangena hminga la awm ram a neih chu pass mumal nei loin hun rei tak a awm a. Kum 2021 khan department hmalakna in pass hi tih fel a ni.
# Miin lirthei thar a leiin, Transport office-ah registration tihfel nan hun tam tak senga an buaipui thin tih ziaawm nan, 2019 atang khan lirthei hralhtu – dealer ten anmahni dawrtute motor registration an lo tihsakna tur Dealer Point Registration siam a ni a. Hei hian lirthei leitu mipui leh department lam buaina a tih tlem phah.
# Bungraw phur chi lirthei, an phurh theih zat phal chin aia rita phur thinte chu kawng rah chhiat thua mawhphurtu zingah an tel thin avangin hmun li – Vairengte, Rengtekawn Kolasib, Kanhmun leh Champhaiah weighbridge dah a ni dawn a. Weighbridge atanga sum lut hi a enkawltu leh sawrkarin 75:25 in hlawkna an insem dawn a ni.
# Lirthei tawng tawh, off road ngaite khawl hmanga endikna tur hmun ruahman mek a ni. Kum 2018 atanga June 2023 thlengin sawrkar lirthei 432 chu hman zui tlak tawh lo, ‘condemned’ tawh an ni a; heng zingah hian Transport department lirthei pawh 43 a tel. Lirthei condemned tawh tihralna atang hian sawrkar sumbawmah Rs. 27,34,163 an chhunglut.
# Kum 15 tling tawh lirthei, registration renew zui loh chu enchiangin, neitu hriat loh, lirthei awm tawh lo leh lirthei chhiah ba ngaihsak loh lirthei 45646 chu a neitute hnenah registration renew tura hriattir an ni a. Hriattir nawn leh an nih hnu ah 43137 chu ‘blacklist’ an ni. Kum 2021 chhung khan lirthei resgitration 8708 chu demand notice pek niin, registration renew zui lo mimal lirthei 8365 leh sawrkar lirthei 130 chu blacklist an ni bawk.