Mipui leh an party tana beitute chungah lawm

MLA inthlanpui neiha vote thlaktu mipui leh a bikin an party tana theihtawp chhuahtute chungah an lawm hle tih Congress party chuan an sawi.
MPCC thuchhuak chuan, inthlan tluang taka neih a ni chu lawmawm a tih thu sawiin, ‘Mipui pawhin vote kan thlak tha hle in kan hria a, ram hruaitu thlan heti taka kan ngaipawimawh hi kan ngaihlu a, mipui chungah lawmthu kan sawi a ni. An duhthlanna hlu tak lantirtuten ram hruaitu tha tak thlang chhuak se tih hi kan duhthusam a ni,’ a ti.
Inthlan buaipuitu chief electoral officer leh a hote, district leh booth tina inthlan buaipuitute leh MPF-in inthlan muanawm leh felfai min neihpui thei chu an chhuang a, an chungah lawmthu a sawi tih a sawi. Hetihlai hian hmun thenkhatah inthlan buaipuitu vanduaina tawk leh harsatna tawk an awm tih an hriatin an tuarpui takzet tih a sawi a ni.
Congress party vote tute, party tana tha leh zung, an hun hlu tak senga thahnemngai taka beitute an ngaihlu a, an hnathawh hian sawrkar tha a la hruai thleng ngei ang tih an beisei a, an chungah Congress party chuan lawmthu a sawi tih sawiin, ‘In hnathawh te Congress party chuan a hrereng dawn a, in hnathawh hian tun leh nakin thlengin party a tichak zel ang tih kan ring tlat a. Mipui duhthusam leh beiseina a taka tihhlawhtlin kan tum a ni,’ a ti.